Fjórir orðaðir við embætti vígslubiskups

Að minnsta kosti fjórir prestar eru sagðir gefa kost á sér í embætti vígslubiskups í Skálholti. Kristján Valur Ingólfsson vígslubiskup lætur af störfum vegna aldurs síðar á þessu ári.

Samkvæmt heimildum Fréttablaðsins eru þeir prestar sem hafa verið orðaðir við embættið fjórir. Það eru þeir Axel Árnason, héraðsprestur á Suðurlandi, Sighvatur Karlsson sóknarprestur á Húsavík, Kristján Björnsson sóknarprestur á Eyrarbakka og Stokkseyri og Eiríkur Jóhannsson í Háteigskirkju. Um helgina skoruðu síðan ellefu nafngreindir prestar á Vigfús Bjarna Albertsson sjúkrahússprest að gefa kost á sér í embættið. Ólíkt hinum fjórum hefur hann ekki lýst áhuga sínum á embættinu hingað til.

Kristján Valur segist allt eins eiga von á því að fleiri en þeir sem nú þegar hafi verið nefndir til leiks muni gefa kost á sér í embættið. „Ég tel að það verði ekki fyrr en kjörstjórn gefur út tímabil til þess að ljúka kosningu sem öll nöfn koma í ljós. Þannig að ég hef fulla trú á því að það verði fleiri nöfn í pottinum en þau sem þegar hafa verið nefnd,“ segir hann. Kristján Valur segir ekki heldur viðbúið að næsti vígslubiskup í Skálholti verði karlmaður, þótt konur gegni embætti biskups Íslands og embætti vígslubiskups á Hólum. „Það er ekkert sem segir að það þurfi að vera karl hér. Það mætti alls ekki vera þannig að konur teldu að þeim væri haldið frá því að sækja um embættið. Það gæti bara verið ágætis prufa að hafa einu sinni þrjár konur,“ segir hann.

Þegar nýr vígslubiskup verður kjörinn síðar á árinu verður kosið eftir nýjum reglum sem samþykktar voru á síðasta kirkjuþingi, í mars. Þær reglur verða birtar í stjórnartíðindum fljótlega. Nýju reglurnar fela í sér að fyrst fari fram forval þar sem allir vígðir menn innan kirkjunnar velji mann. Þeir þrír menn sem oftast eru nefndir í forvalinu eru síðan í kjöri til vígslubiskups. Hjördís Stefánsdóttir formaður kjörstjórnar segist ekki geta upplýst um þá tímalínu sem framundan er í kjörinu. Hún á þó von á að kjörstjórn hittist núna í vikunni eða næstu til þess að fara yfir þau mál. 

Fréttin birtist fyrst í Fréttablaðinu