Dóttir Kristínar í mikilli hættu þegar snjór stíflaði púströr

„Í dag hefði Lovísa auðveldlega getað dáið!“ Þannig hefst Facebook færsla Kristínar Hafsteinsdóttur. Þar segir hún frá því að eins árs gömul dóttir hennar hafi verið hætt komin í gær á meðan maðurinn hennar mokaði frá bílnum.

„Maðurinn minn var að fara með krakkana út í bíl svo hann gæti sótt mig í vinnuna. Hann setur Lovísu í bílstólinn og startar bílnum á meðan strákurinn okkar er úti með honum að moka frá bílnum,“ skrifar Kristín.

Barnið hafi farið að gráta svo að maður Kristínar dreif sig að moka og leit svo inn í bíl.

„Hún er grafkyrr í bílstólnum og með lokuð augun svo hann heldur að hún sé sofnuð. Þegar hann opnar bílhurðina til þess að hleypa stráknum inn í bílinn kemur á móti honum útblásturslykt frá bílnum.“

Kristín skrifar að snjórinn hafi lokað fyrir púströr bílsins svo að útblásturinn hafi borist inn í bílinn.

„Hann drífur sig að Lovísu þar sem hún er orðin grá og föl í framan. Rífur hana úr bílstólnum og blæs framan í hana þar til hún rankar við sér. Hún er í góðu lagi en passið ykkur á þessu!“

„Þetta getur verið stórhættulegt og ég hvet foreldra til þess að skilja börnin sín aldrei ein eftir inni í bíl sem er í gangi, þótt það sé aðeins í stutta stund,“ segir Kristín í samtali við fréttastofu RÚV.