Sýrlandsstjórn sakar Ísraela um eldflaugaárásir

Sýrlandsstjórn sakar Ísraela um að hafa gert eldflaugaárás á herflugvöll vestur af sýrlensku höfuðborginni Damaskus í gærkvöldi.

Ríkismiðlar þar í landi vitna í herforingja sem segja að nokkrum eldflaugum hafi verið skotið á völlinn sem er í Mezzeh. Í frétt BBC segir að ekki sé ljóst hvort mannfall hafði orðið.

Ísraelska ríkisstjórnin hefur ekki játað því né neitað hvort þeir hafi framkvæmt árásina í Sýrlandi en þetta er ekki í fyrsta sinn sem Sýrlendingar saka þá um slíkt.

Talið er víst að Ísraelar hafi margoft frá árinu 2011 gert árásir á flutningalestir þar sem verið var að flytja vopn til Hezbollah-samtakanna sem hafa stutt Bashar al-Assad forseta í borgarastríðinu í Sýrlandi.