Telja ósennilegt að gatið skýri mögulega slysasleppingu

Matvælastofnun telur ósennilegt að gat sem fannst á botni eldiskvíar á vegum Arctic Sea Farm í Dýrafirði geti útskýrt mögulega slysasleppingu regnbogasilungs sem var til umfjöllunar síðastliðið haust.

Starfsmenn fiskeldisfyrirtækisins telja að umtalsvert magn regnbogasilungs hafi sloppið úr eldinu þar sem í dag fannst gat við botn kvíar og í tilkynningu frá fyrirtækinu í gær sagði að þarna kunni að vera komin „meginskýringin á mögulegri slysasleppingu regnbogasilungs sem fjallað var um sl. haust þegar engin skýring fannst á því hvaðan regnbogasilungur væri upprunninn sem veiddist í ám á Vestfjörðum.“

Matvælastofnun telur þó ósennilegt að málin tengist og nálgast þau sem tvö aðskilin tilfelli að svo stöddu. Talsverður stærðarmunur sé á þeim fiskum sem veiddust í sumar og þeim fisk sem alinn er upp í umræddri kví. Matvælastofnun mun þó óska eftir ítarlegri upplýsingum úr kvínni.

Í tilkynningu frá Matvælastofnun segir að í eftirliti stofnunarinnar með starfsstöðvum Arctic Sea Farm í Dýrafirði þann 20. júní sl. kom fram að búnaður fyrirtækisins var í lagi, þjálfun starfsmanna var einnig í lagi, neðansjávareftirlit var reglulegt, viðbragðsáætlun var til staðar vegna slysasleppinga og var hún aðgengileg á eldissvæðinu. Engin frávik komu fram í verklagi eða búnaði sem gætu orsakað sleppingar úr kvíum.

Fyrirtækið hefur í samráði við Fiskistofu sett af stað viðbragðsáætlun vegna slysasleppinga og verið er að leggja mat á fjölda fiska sem hafa sloppið. Eftirlitsmaður á vegum Matvælastofnunar mun skoða aðstæður hjá fyrirtækinu á morgun og frekari upplýsinga verður aflað um mögulegt umfang sleppingar og tildrög hennar.