Stúlkur allt niður í níu ára vilja lýtaaðgerðir á skapabörmum

Breskar stúlkur allt niður í níu ár að aldri sækjast eftir að fara í lýtaaðgerðir á skapabörmum vegna óánægju með útlit þeirra.

Frá þessu er greint í frétt á vef BBC. Þar er rætt við Dr. Naomi Crouch, kvensjúkdómalækni sem sérhæfir sig í þjónustu við unglingsstúlkur, segist hafa áhyggjur af því að heimilislæknar vísi ungum stúlkum, sem vilji slíka aðgerð, til lýtalækna.

Aðgerðin lýsir sér þannig að skapabarmarnir eru styttir eða endurmótaðir. Breska heilbrigðisstofnunin, NHS, segir að slíkar aðgerðir eigi ekki að vera gerðar á stúlkum yngri en 18 ára. Á árunum 2015 og 2016 gengust 200 stúlkur undir átján ára aldri undir slíka aðgerð í Bretlandi. Þar af höfðu rúmlega 150 þeirra ekki náð 15 ára aldri.

Grouch segist aldrei á sínum ferli séð stúlku sem þyrfti á slíkri aðgerð að halda, en að margar stúlkur sem leiti til hennar lýsi yfir áhyggjum af útliti kynfæra sinna. Hún segir að slíkar aðgerðir eigi einungis að vera framkvæmdar ef læknisfræðileg nauðsyn er til.

„Ég á mjög erfitt með að trúa því að 150 stúkur séu með afbrigðilega skapabarma sem krefjist aðgerðar,“ segir Grouch.

Kynfæri fólks misjöfn rétt eins og andlit

Paquitea de Zulueta hefur starfað sem heimilislæknir í rúmlega 30 ár. Hún segir að það hafi færst í aukana að stúlkur í kringum 11-13 ára haldi að eitthvað sé að kynfærum þeirra. 

„Þær halda að innri barmarnir eigi að vera ósýnilegir, næstum eins og á Barbie dúkku, en staðreyndin er sú að þetta er misjafnt,“ segir de Zulueta.

Hún telur að vandamálið megi rekja til óraunsærra útlitsstaðla sem birtist stúlkum í klámi og í gegnum samfélagsmiðla.

„Það er ekki næg fræðsla en það ætti að byrja snemma að útskýra að þetta er alls konar. Alveg eins og við erum öll ólík í framan þá erum við öll ólík þarna niðri og það er allt í lagi.“

Samkvæmt NHS fá engar stúlkur undir 18 ára að fara í slíka aðgerð nema af læknisfræðilegum ástæðum. De Zulueta segir að stúlkur séu meðvitaðar um að þær þurfi að ýkja líkamleg einkenni til að fá að fara í slíka aðgerð.

„Þær eru meðvitaðar um að þær eru líklegri til að fá að gangast undir aðgerð ef þær sgja að þetta hafi áhrif á kynlíf eða íþróttir.“