Franski framherjinn Alexandre Lacazette gengur í raðir Arsenal í dag eða á morgun en þetta staðfestir Jean-Michel Aulas, forseti Lyon.
Samningaviðræður félaganna hafa staðið yfir í nokkrar vikur en Lyon hafnaði fyrsta tilboði Arsenal sem hljóðaði upp á 39 milljónir punda.
Talið er að Arsenal borgi 43,8 milljónir punda fyrir franska markahrókinn sem þýðir að hann verður dýrasti leikmaður í sögu félagsins. Mest hefur félagið borgað 42,5 milljónir punda fyrir Mesut Özil fyrir fjórum árum síðan.
„Salan á Alexandre Lacazette til Arsenal ætti að ganga í gegn í dag eða á morgun. Þessar 67 milljónir evra sem fjölmiðlar töluðu um fyrst er út úr korti. Þetta verður sala upp á 45-50 milljónir evra,“ segir Aulas við franska miðilinn Le Progres.
„Þetta verða dýrustu kaup Arsenal og hæsta verð sem Lyon hefur selt leikmann fyrir,“ segir Jean-Michel Aulas.
Arsenal datt í lukkupottinn fyrr í sumar þegar Alþjóðaíþróttadómstóllinn úrskurðaði Atlético Madrid í félagaskiptabann því Alexandre Lacazette var búinn að semja munnlega við spænska félagið.
Lacazette skoraði 28 mörk og lagði upp önnur þrjú í frönsku 1. deildinni á síðsutu leiktíð en í heildina skoraði hann 37 mörk í 45 leikjum í öllum keppnum.
Lacazette verður sá dýrasti í sögu Arsenal
