Everton náð samkomulagi við Swansea | Launakröfur Gylfa flækja málin

Everton hefur náð samkomulagi við Swansea City um kaup á Gylfa Þór Sigurðssyni. Launakröfur íslenska landsliðsmannsins gætu þó sett strik í reikninginn.

Mirror greinir frá því að kauptilboðið hafi hljóðað upp á 25 milljónir punda.

Gylfi fær 80.000 pund í vikulaun hjá Swansea en hann ku vilja umtalsverða launahækkun ef hann fer til Everton. Í frétt Mirror segir að Gylfi vilji fá 120.000 pund í vikulaun hjá Everton.

Gylfi var besti leikmaður Swansea á síðasta tímabili. Íslenski landsliðsmaðurinn skoraði níu mörk og gaf 13 stoðsendingar og átti stærstan þátt í því að Swansea hélt sæti sínu í ensku úrvalsdeildinni.

Frammistaða Gylfa vakti athygli liða á borð við Everton, Southampton og Tottenham en svo virðist sem fyrstnefnda liðið hafi unnið kapphlaupið um hann.