Ljósin tendruð á Akureyrarvöku

„Við erum einlæglega glöð og þakklát fyrir hversu vel gekk. Vel heppnaðri Akureyrarvöku er lokið og við gætum ekki verið glaðari,“ segir Hulda Sif Hermannsdóttir, annar tveggja verkefnastjóra um nýafstaðna afmælishátíð Akureyrarbæjar.

Spurð að því hvað hafi staðið upp úr að mati verkefnastjórans er því auðsvarað: „Lystigarðurinn í gær og Listagilið í kvöld,“ segir Hulda. Í kvöld tróð upp hljómsveitin VAÐLAHEIÐIN sem sett var saman sérstaklega fyrir Akureyrarvöku. Hljómsveitina skipa Valur Freyr Halldórsson, Summi Hvanndal, Kristján Edelstein, Arnar Tryggvason og Valmar Valjaots en þeir voru sérlegir gestgjafar á sviðinu. 

Gestir á tónleikunum voru Andrea Gylfadóttir, Pálmi Gunnarsson, KÁ-AKÁ, Valdimar og Jóhanna Guðrún.

Svokölluð Friðarvaka í kirkjutröppunum er orðin árviss viðburður á Akureyrarvöku en þá eru tröppurnar sem liggja upp að Akureyrarkirkju fylltar af friðarkertum. Bæjarbúar og gestir hátíðarinnar eru hvattir til að taka þátt í góðverkinu með því að kaupa kerti. Í Friðarvökunni var safnað fyrir hjartastuðtækjum sem verður komið fyrir á fjölförnum stöðum í bænum.

En hvers vegna hafa Akureyringar þann háttinn á að ljúka hátíðinni með því að kveikja á kertum í stað flugeldasýningar eins og tíðkast?

„Með Friðarvöku gefst fólki tækifæri til að taka þátt og leggja sitt af mörkum. Það er þessi tilfinning að vera hluti af heild sem lætur gott af sér leiða,“ segir Hulda Sif Hermannsdóttir.