Dæmdur fyrir að áreita drengi í Laugardalslauginni

Hæstiréttur dæmdi í dag Magnús Skarphéðinsson, formann Sálarrannsóknarfélags Reykjavíkur og formann félags áhugafólks um fljúgandi furðuhluti, í tveggja mánaða skilorðsbundið fangelsi fyrir kynferðisbrot gegn tveimur sautján ára piltum. Brotið átti sér stað í heita pottinum í Laugardalslauginni í desember 2014. Var Magnús jafnframt dæmdur til þess að greiða öðrum piltanna 300 þúsund krónur í miskabætur en hinum 200 þúsund krónur.

Hæstiréttur staðfesti dóm héraðsdóms frá því í desember á síðasta ári en var meðal annars litið til þess við ákvörðun refsingar að Magnús hafði ekki áður gerst sekur um refsivert brot. Bætur drengjanna voru þó lækkaðar í Hæstarétti en hafði héraðsdómur talið hæfilegar bætur 600 þúsund til annars drengsins en 400 þúsund til hins. 

Brot Magnúsar fólst í því að hann viðhafði kynferðislegt tal við drengina er þeir voru staddir í heitum potti í Laugardalslauginni að kvöldlagi í desember 2014. Hann á meðal annars að hafa sagt við annan piltanna að hann ætlaði að „taka hann í rassinn“. Því næst togaði hann í buxnastreng á sundbuxunum hans en tókst ekki að draga buxurnar niður fyrir kynfæri hans.

Pilturinn var fastagestur í sundlauginni og það var Magnús einnig. Því könnuðust þeir hvor við annan.

Magnús taldi sig ekki hafa áreitt drengina kynferðislega heldur hafi um sprell verið að ræða. Hann sagðist hafa farið í gamnislag við piltana tvo og gripið í sundbuxur annars piltsins vegna þess að hann missti jafnvægi.

Hins vegar þótti framburður piltanna trúverðugur og þess auki var til myndbandsupptaka úr eftirlitsmyndavél sem sýndi piltinn reyna að slíta sig lausan frá Magnúsi. Ekki var séð af myndskeiðinu að um gamnislag hefði verið að ræða.

Dóminn má lesa í heild sinni hér.