Nagelsmann líklegastur til að taka við Bayern

Julian Nagelsmann þykir líklegastur til að taka við stjórastarfinu hjá Bayern München samkvæmt veðbönkum.

Carlo Ancelotti var rekinn í dag eftir aðeins rúmt ár í starfi. Hann stýrði Bayern í síðasta sinn í 0-3 tapi fyrir Paris Saint-Germain í Meistaradeild Evrópu í gær.

Nagelsmann, sem er aðeins þrítugur, hefur náð eftirtektarverðum árangri með Hoffenheim og kom liðinu m.a. í forkeppni Meistaradeildarinnar. Hann skrifaði undir nýjan samning við Hoffenheim í sumar.

Willy Sagnol, sem var aðstoðarþjálfari Ancelottis og mun stýra Bayern þangað til nýr stjóri finnst, er annar á lista veðbanka.

Thomas Tuchel, sem var látinn fara frá Borussia Dortmund í vor, er þriðji á listanum og Jürgen Klopp, stjóri Liverpool, fjórði.

Margir fleiri eru nefndir til sögunnar, þ.á.m. Brendan Rodgers, Joachim Löw, Louis van Gaal, Luis Enrique og Rafa Benítez.