„Ísland er væntanlega ekki að fara neitt“

Kvikmyndin The Square hefur fengið afar góð viðbrögð og góða dóma. Aðalleikari myndarinnar, hinn danski Claes Bang, stoppaði stutt á Íslandi til að vera viðstaddur frumsýningu myndarinnar um helgina. Hann stefnir á að koma aftur síðar og verja lengri tíma hér á landi.

Aðspurður hvaða áhrif hann telji hlutverkið í The Square hafa á feril hans segir Bang: „Það er ótrúlega erfitt að segja til um það á þessu stigi. Það hefur óneitanlega hjálpað allri sölu og dreifingu myndarinnar að hún vann Gullpálmann á Cannes í vor. Síðast þegar ég talaði við framleiðandann var búið að selja hana til allra landa í heiminum nema Mongólíu. Núna vona ég auðvitað að þetta hlutverk opni mér enn fleiri dyr. Mér er í raun sama hvar ég vinn, það eru verkin og innihald þeirra sem skipta mig mestu máli,“ segir Bang sem er þessa stundina að leika í verki í litlu leikhúsi í Óðinsvéum.

Bang fer með hlutverk Christians, fráskilins föður sem keyrir um á rafmagnsbíl og er virtur sýningarstjóri í nútímalistasafni í Svíþjóð. Spurður hvort hann hafi tengt að einhverju leyti við Christian svarar Bang játandi: „Guð minn góður. Það er svo mikið af sjálfum mér í honum. Leikstjórinn [Ruben Östlund] er alltaf að leita eftir eins raunverulegum og einlægum viðbrögðum í myndunum sínum og hægt er. Hann vill ekki að maður leiki eða framleiði viðbrögð heldur vill hann að leikararnir bregðist við á eins náttúrulegan hátt og mögulegt er. Í upphafi myndarinnar er Christian rændur á meðan hann er að reyna að hjálpa konu í hættu. Hann reynir að gera góðverk en er rændur í leiðinni, hann reiðist og bregst við á heimskulegan hátt. En ég held að flestir áhorfendur geti tengt við mannleg viðbrögð hans.“

Bang vann töluverða undirbúningsvinnu áður en tökur hófust og reyndi m.a. að komast inn í hugarheim sýningarstjóra. „Myndin gerist innan listaheimsins og Christian er sýningarstjóri þannig að ég hitti nokkra safnstjóra sjálfur og við byggðum búningavalið til dæmis á safn- og sýningarstjórum í Skandinavíu. Ég reyndi að setja mig inn í hugarheim þeirra, fas og orðnotkun.“

Stutt stopp á Íslandi

Bang fer með aðalhlutverkið í The Square á móti bandarísku leikkonunni Elisabeth Moss sem margir kannast við úr Mad Men og The Handmaid’s Tale.

Hvernig var að vinna með Elisabeth Moss? „Hún kom ekki fyrr en á síðustu tíu tökudögunum, en í heildina þá voru 75 tökudagar sem er mjög langur tími fyrir kvikmyndatökur. Þannig að allir voru orðnir nokkuð þreyttir á þeim tímapunkti.“

„Elisabeth kom eins og ferskur andvari á settið og það var alveg frábært að vinna með henni. Hún er mögnuð leikkona sem lagaði sig samstundis að verklagi leikstjórans.“

Bang stoppaði stutt á Íslandi og náði því ekki að kynnast landinu almennilega á meðan á dvöl hans stóð: „Ég er svolítið lasinn núna þannig að ég kemst ekki í neinar skoðunarferðir og ég er svo stutt á landinu í þetta skiptið. Ísland er væntanlega ekki að fara neitt og ég myndi gjarnan vilja koma aftur einhvern tímann í framtíðinni og vera í viku og skoða landið betur.“