Ísland og 25 ára saga ensku úrvalsdeildarinnar

Enska úrvalsdeildin fagnar 25 ára afmæli sínu um þessar mundir og það er því ekki úr vegi að skoða þátttöku íslenskra knattspyrnumanna í deildinni á þessum aldarfjórðungi. Hér fyrir neðan eru nokkrar íslenskar staðreyndir um ensku úrvalsdeildina frá 1992 til 2017.

31. ágúst 1992

Þorvaldur Örlygsson er fyrsti Íslendingurinn til að spila í ensku úrvalsdeildinni þegar hann spilaði allar 90 mínúturnar í 3-1 tapi Nott. Forest á móti Norwich á Carrow Road.

16. janúar 1993

Þorvaldur Örlygsson er fyrsti Íslendingurinn sem skorar í ensku úrvalsdeildinni þegar hann innsiglar 3-0 sigur Nottingham Forest á Chelsea á City Ground fimm mínútum eftir að hann kom inn á.

 

332

Hermann Hreiðarsson er sá Íslendingur sem hefur spilað flesta leiki í ensku úrvalsdeildinni en hann lék ellefu tímabil í deildinni með liðunum Crystal Palace, Wimbledon, Ipswich, Charlton og Portsmouth.

 

55

Eiður Smári Guðjohnsen er sá Íslendingur sem hefur skorað flest mörk í ensku úrvalsdeildinni fyrir Chelsea (54) og Tottenham (1).

 

 

33

Gylfi Þór Sigurðsson er sá Íslendingur sem hefur gefið flestar stoðsendingar í ensku úrvalsdeildinni.

2

Tveir íslenskir leikmenn hafa náð að skora í sínum fyrsta leik í ensku úrvalsdeildinni en það eru Heiðar Helguson með Watford á móti Liverpool 15. janúar 2000 og Jóhannes Karl Guðjónsson með Aston Villa á móti Middles­brough 28. janúar 2003.