250 milljóna króna viðgerð á Toppstöðinni

Sjálfstæðismenn í borgarstjórn eru ósáttir við hugmyndir um að verja eigi 250 milljónum króna í uppbyggingu á Rafstöðvarvegi 4. Segja þeir eðlilegra að ráðast í bráðaviðgerðir á húsnæði grunnskóla og leikskóla en að verja fé í þetta.

Borgarráð samþykkti á fimmtudaginn tillögu þess efnis að auglýst verði eftir samstarfsaðila um þróun Toppstöðvarinnar í Elliðaárdal. Í greinargerð með tillögunni segir að gert sé ráð fyrir að lagðar verði 250 milljónir í viðgerðir á húsinu. 

„Sú upphæð mun að öllum líkindum einungis duga til þess að bæta ytra byrði en umtalsvert meiri fjárfestingu þarf til þess að koma húsinu í góð framtíðarnot,“ segir í greinargerð með tillögunni. Því þyrfti samstarfsaðili sjálfur að fjármagna framkvæmdir umfram framkvæmdir borgarinnar sem þarf til að búa húsið undir nýja starfsemi. Áður hafði verið ákveðið að rífa húsið, en þeim áætlunum hefur nú verið breytt.

„Við óskum líka eftir upplýsingum um hver niðurrifskostnaðurinn gæti orðið. En mér finnst ólíklegt að þetta hús verði rifið. Út frá byggingarlegu sjónarmiði er þetta merkilegt hús, er mér sagt. Þetta er stálgrindarhús sem er hnoðað. Einhvers konar Marshallaðstoðarhús,“ segir Halldór Halldórsson, oddviti Sjálfstæðismanna í borgarstjórn. Þess vegna sé eðlilegast að fá rekstraraðila sem geti að fullu skilað viðhaldspeningunum til baka í leigu eða einhverju svipuð formi. „En við hlaupum ekki í viðgerðir á þessu húsi fyrir 250 milljónir þegar þörfin er svona brýn í leikskólum og grunnskólum,“ bætir Halldór við.

Björn Blöndal, formaður borgarráðs, segir að þrátt fyrir bókunina hafi Sjálfstæðismenn samþykkt tillöguna í atkvæðagreiðslu. „Ég er alveg sammála því að maður verður alltaf að hugsa þetta, hvar á maður að nota peningana. En þau láta líta út eins og við séum ekkert að gera í viðhaldi í leikskólum og grunnskólum. Það er mesta kjaftæði,“ segir Björn og bætir við að í ár sé fimm milljörðum varið í nýbyggingar, viðbyggingar og endurgerð skólalóða. Hann bætir því jafnframt við að ekki verði lagðir peningar í viðhald á Toppstöðinni fyrr en það liggur ljóst fyrir hvaða hugmyndir mögulegir samstarfsaðilar koma með. 

Reist árið 1946

Hús Toppstöðvarinnar að Rafstöðvarvegi 4 var reist árið 1946. Samkvæmt upplýsingum sem Borgarsögusafn hefur tekið saman var húsið tekið í notkun árið 1948 og hafði það hlutverk að sinna toppálagspunktum í raforkuþörf og hitaveitu og dregur nafn sitt af því hlutverki. Með tilkomu Búrfellsvirkjunar árið 1969 minnkaði notkun Toppstöðvarinnar en hún var endanlega lögð af árið 1981. Árið 2008 tók samnefnt frumkvöðlasetur hluta hússins undir sína starfsemi.