„Ef ég hefði ekki bremsað og hinn hefði ekki bremsað hefði það endað með því að einhver hefði dáið“

„Hann negldi niður. Ef ég hefði ekki bremsað og hinn hefði ekki bremsað hefði það endað með því að einhver hefði dáið,“ segir Gunnar Yngvi Rúnarsson, vöruflutningabílstjóri. Gunnar lenti í því í gær að maður tók fram úr honum og litlu munaði að stórslys yrði.

Atvikið átti sér stað fyrir austan, á Háreksstaðarleið, rétt við afleggjarann við Vopnafjörð. Gunnar birti myndband af atvikinu á Facebook síðu sinni. Þar má sjá mann í framúrakstri, keyra á ógnarhraða og vera hársbreidd frá því að lenda framan á bíl á hinum vegarhelmingnum. Þá má einnig sjá þar, í byrjun myndbandsins, lítinn flutningabíl sem virðist vera í þann mund að beygja fyrir Gunnar.

Fer leiðina á hverjum degi

Gunnar segist keyra þessa leið alla daga og að ástandið sé að versna. Hann telur þetta líklega hafa verið bílaleigubíl.

„Ég gef alltaf stefnuljós til vinstri ef ég sé að hann ætlar að taka fram úr og það er að koma bíll á móti. Þarna var ég búin að vera með stefnuljósið á alveg töluvert lengi til vinstri og ég var búin að sveigja einu sinni fyrir hann svo hann myndi ekki fara fram úr. Svo um leið og ég var komin inn á minn kant til að mæta hinum bílnum, þá fer hann fram úr,“ segir Gunnar og nefnir að hann hafi ekki mætt bíl í rúmar tuttugu mínútur eftir þetta.

Engar myndavélar

Gunnar segir engar myndavélar vera á svæðinu. Aðspurður um viðbrögð hjá þeim sem séu að keyra þjóðvegina að atvinnu segir Gunnar þess konar glæfraakstur vera að aukast og rætt sé um það þeirra á meðal.

Jónas Vilhelmsson, yfirlögregluþjónn á Austurlandi, staðfestir í samtali við Vísi að engar myndavélar séu á svæðinu en þeir reyni hvað þeir geti að sinna eftirliti þar.

„Það eru hraðamyndavélar í göngum en svo er þetta bara á örfáum stöðum á landinu þar sem eru hraðamyndavélar við þjóðveginn,“ segir Jónas.

Hann segir að þeir séu ekki að fá mikið af tilkynningum en þeir viti af því að á þessum stað sé nokkuð um glæfraakstur. Þeir hafi tekið vaktir þarna þar sem þeir hafa skráð hátt í 25 tilfelli á einum degi.

Þyngri umferð

Jónas segir að umferð á þjóðveginum hafi orðið þyngri eftir að ferðamönnum fjölgaði hér á landi. Þjóðvegirnir beri margir ekki allan þennan fjölda Þá séu einnig augljóst að ökuþórar hafi minni þolinmæði en áður og taki meiri áhættu.

„Fólk hefur enga þolinmæði til að vera í umferðinni. Það er orðið margt í umferðinni víða og það eru allskonar farartæki,“ segir Jónas. Þá sé líka mismunandi þekking á vegum landsins sem og á þeim ökutækjum sem fólk stýrir.

Jónas segir að þeir muni skoða allar upplýsingar sem þeir fá og reyna að gera það sem hægt er.