Segir að Zlatan vilji spila áfram í Evrópu

Miklar vangaveltur hafa verið í kringum framtíð Zlatan Ibrahimovic eftir að ljóst væri að hann myndi ekki vera áfram hjá Manchester United á Englandi.

Ibrahimovic, sem er orðinn 35 ára gamall, lék á síðasta tímabili með Manchester United eftir að hafa komið þangað frá Paris-Saint Germain í Frakklandi. Hann lék 28 leiki með enska liðinu og skoraði 17 mörk.

Talið var að leið sænska framherjans myndi liggja til Bandaríkjanna og þá til stórliðsins þar í landi, LA Galaxy.

Í samtali við ESPN segir hinsvegar Chris Klein, forseti LA Galaxy, að hann telji að Zlatan vilji spila áfram í Evrópu, en bætir við að bandaríska liðið hafi samt enn áhuga á að semja við Ibrahimovic í framtíðinni. Bandaríska liðið er nú þegar komnir með þrjá erlenda leikmenn í lið sitt en ákveðnar reglur gilda í MLS-deildinni í Bandaríkjunum um fjölda erlendra leikmanna í hverju liði.

Zlatan sem er enn að jafna sig eftir erfið hnémeiðsl, verður sennilega ekki klár í slaginn fyrr en á næsta ári og fróðlegt verður að sjá í hvaða lið þessi stórkostlegi framherji fer í.