Tvö mannfrek útköll gerðu slökkviliði erfitt fyrir

Mannfrek útköll gerðu slökkviliði erfitt fyrir í tveimur útköllum sem urðu með mínútu millibili í gærkvöldi en mildi þykir að enginn hafi slasast þegar mikil eldur kom upp í íbúðarhúsi í Skerjafirði.

Tilkynning barst til Neyðarlínunnar um eld í gasgrilli í Bauganesi klukkan fjóra mínútur yfir átta í gærkvöldi. Slökkviliðsmenn gerðu sig reiðubúna til þess að fara á staðinn en rétt um mínútu síðar barst önnur tilkynning um að skúta væri á hvolfi í Skerjafirði og að tveir menn væru á kili skútunnar. Köfunarteymi slökkviliðsins, sem mannað er sömu áhöfn og á dælubílnum í Skógarhlíð fór í Nauthólsvík til að athuga með skútuna, en tveir menn voru sendir á dælubíl í brunann við Bauganes, en auk þeirra var aðstoð send af stað frá slökkvistöðinni í Hafnarfirði.

„Við áttum ekki von á þessu með nýja fína grillið okkar. Við grilluðum bara úti og settumst inn að borða og vorum búin að vera að því í um tíu mínútur og þá kíkjum við út og þá stendur grillið í ljósum logum,“ sagði Stefán Sigurjónsson, íbúi í húsinu.

Áttuðuð þið  ykkur á því að það væri ekki við neitt ráðið þegar þið sáuð hvernig var úti á svölum?

„Já, það var bara bál upp í loft,“ segir Stefán.

Þegar slökkviliðsmenn voru við það að slökkva eldinn í gasgrillinu blossaði upp eldur á efri hæð hússins og í millilofti undir þaki og þar reyndist talsverður eldsmatur. Þetta fór svolítið öðruvísi en fyrsta tilkynning gaf til kynna um?

„Já, og það bætti í það líka kafaraútkall, þannig að það var lítill mannskapur til að byrja með. Þurftum að sækja mannskapinn lengra frá þannig að þetta tók aðeins lengri tíma,“ segir Þórir Karl Jónasson, varðstjóri hjá Slökkviliði höfuðborgarsvæðisins.

Ásamt slökkviliði tóku þyrla Landhelgisgæslunnar og björgunarsveitir þátt í leit að skútunni og mönnunum í Skerjafirði en fljótt var það afturkallað þar sem í ljós kom að sjóbauja hafi vilt tilkynnanda sýn. Á meðan var búið að kalla út allt tiltækt slökkvilið að Bauganesi þar sem eldur þar var orðinn mjög mikill.

„Við tölum okkur vera búna en þá hefur greinilega komist eldur upp á milliloftið sem við vissum ekki um þannig að reykkafarar áttu erfitt með að athafna sig þar þannig að við urðum að vinna þetta allt utan frá. Rífa þakið utan frá,“ segir Þórir.

Tvö mannfrek útköll, þetta er ekki gott?

„Já mannfrek útköll og búið að hringja út aukamannskap til þess að sinna sjúkraflutningum, þeir hætta ekkert á meðan,“ segir Þórir.