Lilja Alfreðsdóttir: „Mér líður vel með hvernig ég greiddi atkvæði“

Allir þingmenn Framsóknarflokksins sammæltust um að greiða ekki atkvæði í kosningu um dómara í Landsrétti. Atkvæðagreiðslan átti sér stað fyrr í kvöld og var tillagan samþykkt. Framsókn hafði þó kosið með frávísunartillögu stjórnarandstöðunnar sem fól í sér að málinu yrði vísað frá. Vísir hafði samband við Lilju Alfreðsdóttur, fyrrverandi utanríkisráðherra og þingmann flokksins og spurði hana út í þessa niðurstöðu flokksins.

„Við gerum athugasemd við það að ráðherra þurfti meira tíma í heildstæðan rökstuðning fyrir hverjum og einum einstakling. Við efumst ekki um að ráðherrann hafi þessa heimild til að koma með breytingar á listanum. Ég geri ekki athugasemd við það að hún hafi viljað fá meiri dómarareynslu inn í þetta en þá þarf hún að rökstyðja sitt mat í ljósi þess með tilliti til allra umsækjenda en ekki bara þessara fjóra. Ég hef talað fyrir því að allt málið hefði þurft meiri tíma. Þess vegna get ég ekki sagt nei heldur. Ég hefði viljað kalla þing saman aftur eftir tíu daga eða tvær vikur og klára þetta á einum degi. Þá hefðu allir getað skoðað þetta. Þetta er mjög stórt mál og mér lá ekkert á að fara í sumarfrí,“ segir Lilja.

Lilja staðfestir að þingmenn Framsóknarflokksins hafi komist að þeirri sameiginlegu niðurstöðu að best væri að greiða ekki atkvæði.

„Þegar við vorum búin að skoða röksemdarfærsluna, hvort við ættum að vera á nei-inu eða að greiða ekki atkvæði með, þá fannst okkur rökrétt að ef við hefðum ekki nægilega upplýsingar til að segja já þá hefðum við heldur ekki nægilegar upplýsingar eða tíma til að segja nei,“segir Lilja

Aðspurð hvort að minnihlutinn hafi vitað hver afstaða þeirra var svarar Lilja að þau hafi talað saman fyrir atkvæðagreiðsluna. Hún segir það sér ekki vera kunnugt hvort að það hafi komið minnihlutanum á óvart að þau hafi ákveðið að greiða ekki atkvæði en nefnir þó að hún telji ekki að bil hafi nú myndast milli stjórnarandstöðuflokkanna. Þau hafi verið sjálfum sér samkvæm og fært rök fyrir þessu.

„Mér líður vel með hvernig ég greiddi atkvæði,“ svarar Lilja að lokum.