Eftir því sem Fréttablaðið kemst næst er þetta í fyrsta sinn sem sími brotaþola er hleraður og ráðist er í svo umfangsmiklar aðgerðir í rannsókn kynferðisbrots, gegn vilja brotaþola.
Vitni yfirheyrð samtímis
Lögreglan hefur haft málið til rannsóknar síðan um miðjan desember. Í gær voru síðan leidd til lögreglu nokkur vitni samtímis og þau yfirheyrð um málið. Ástæðan fyrir svo umfangsmiklum aðgerðum lögreglunnar var tilraun lögreglu til að vitnin gætu ekki samræmt frásögn sína áður en til yfirheyrslu kæmi.Hinn grunaði í málinu á langan brotaferil að baki og var meðal annars dæmdur fyrir hrottafengna nauðgun þegar kona, sem hann reyndi að kaupa vændi af, neitaði honum um kynlíf árið 2011. Hann er vinur og vel tengdur sumum af hættulegustu mönnum Íslands.

Þá strax var maðurinn dæmdur til að afplána eftirstöðvar fangelsisvistar sinnar, samtals 630 daga, en maðurinn var á reynslulausn þegar ætlað brot átti sér stað.
Sveinn Andri steig inn
Í úrskurði Héraðsdóms Reykjaness um verknaðinn segir að stúlkan hafi mætt á lögreglustöðina aftur nokkrum dögum síðar, dregið framburð sinn til baka og hætt við að kæra vegna þess að menn hefðu komið heim til hennar með byssu og hótað henni.Tveimur dögum síðar var Sveinn Andri Sveinsson orðinn lögmaður konunnar og afturkallaði heimild lögreglunnar til að óska eftir læknisvottorði frá Landspítalanum. Sveinn er enn lögmaður konunnar í málinu en hún var eitt þeirra vitna sem leidd voru til yfirheyrslu í gær. Þar var henni kynnt um símhleranirnar sem lögregla stóð fyrir frá því málið kom upp.
Samkvæmt heimildum Fréttablaðsins hefur konan ekki breytt framburði sínum aftur. Hún hyggst ekki tjá sig frekar við lögreglu um málið.
Upplifir sig sem glæpamann
Í samtali við Fréttablaðið lýsir konan að málið hafi haft gífurlega mikil áhrif á hana. Henni hafi verið meinaður aðgangur að lögreglustöðinni af yfirmanni kynferðisbrotadeildar og upplifi mikið máttleysi gagnvart lögreglu. Aðgerðir lögreglu hafi valdið henni áfalli.Þá hafi lögreglan haldlagt tölvu í eigu sonar hennar og símtæki á heimilinu. Konan segist upplifa sig sem glæpamann fyrir það eitt að neita að tjá sig um nóttina 10. desember. Allt málið frá upphafi hafi verið henni sem martröð.
Öllum vitnum í málinu var sleppt að loknum yfirheyrslum. Samkvæmt upplýsingum frá lögreglu er rannsókn vel á veg komin.