Markametið löngu fallið og samt eru tveir leikir eftir

Það hefur verið meira en nóg af mörkum í fyrri leikjum sextán liða úrslita Meistaradeildarinnar og nú er ljóst að markametið er löngu fallið þrátt fyrir að fjórðungur leikjanna sé enn eftir.

Hingað til hafa verið skoruð 29 mörk í 6 leikjum eða 4,8 mörk að meðaltali í leik. Verði ekkert skorað í leikjunum tveimur í kvöld verður meðalmarkaskorið samt 3,6 mörk í leik.  

Fimm af fyrstu sex leikjum sextán liða úrslitanna hafa innihaldið fjögur eða fleiri mörk. Eini leikurinn sem sker sig úr er 1-0 sigur Benfica á Borussia Dortmund.

Svo ótrúlega vill til að liðin sem skoruðu mest í riðlakeppninni, Borussia Dortmund (21 mark) og Barcelona (20 mörk) eru einu liðin sem hafa ekki skorað í sextán liða úrslitunum til þessa.

Alls voru skoruðu 14 mörk í tveimur frábærum leikjum í gær þar sem Manchester City vann 5-3 sigur á Mónakó og Atlético Madrid fór til Þýskalands og vann 4-2 útisigur á Bayer Leverkusen.

Með þessum tveimur markaveislum í gærkvöldi var ljóst að markametið í fyrri leikjum sextán liða úrslitanna var fallið. Leikmönnum tókst að bæta það um þrjú mörk í gær og það er síðan von á enn frekari bætingu í kvöld.

Gamla metið var 26 mörk og síðan tímabilið 2013-14. Þar munaði mestu um 6-1 útisigur Real Madrid á Schalke 04 þar sem BBC skoruðu öll mörkin en Cristiano Ronaldo, Gareth Bale og Karim Benzema voru allir með tvö mörk í leiknum.  

Annar markahár leikur var þegar Jürgen Klopp fór með lærisveina sína í Borussia Dortmund til Rússlands og vann 4-2 sigur á Zenit.

Zlatan Ibrahimović, núverandi leikmaður Manchester United, skoraði síðan tvö mörk í 4-0 sigri Paris Saint-Germain á útivelli á móti Bayer Leverkusen.



Flest mörk í fyrri leikjum sextán liða úrslitanna:

2016-17: 29 mörk

2013-14: 26 mörk

2011-12: 22 mörk

Úrslit fyrri leikjanna í 16 liða úrslitum

Manchester City - Monakó 5-3

Real Madrid - Napoli 3-1

Benfica - Borussia Dortmund 1-0

Bayern München - Arsenal 5-1

Bayer Leverkusen - Atlético Madrid 2-4

Paris Saint-Germain - Barcelona 4-0

Leikir sem eru eftir (fara fram í kvöld)

Porto - Juventus

Sevilla - Leicester City



Úrslit fyrri leikjanna í 16 liða úrslitum 2013-14 (Gamla metið – 26 mörk)

Manchester City - Barcelona 0–2     

Olympiacos - Manchester United 2–0     

AC Milan - Atlético Madrid 0–1     

Bayer Leverkusen - Paris Saint-Germain 0–4     

Galatasaray - Chelsea 1–1     

Schalke 04 - Real Madrid 1–6     

Zenit Petersburg - Borussia Dortmund 2–4     

Arsenal - Bayern München 0–2     

Markaskor í fyrri leikjum sextán liða úrslitanna síðustu ár:

2016-17: 29 mörk (5 leikir með fjögur mörk eða fleiri) - 2 leikir eftir

2015-16: 21 mark (3 leikir)

2014-15: 17 mörk (1 leikur)

2013-14: 26 mörk (3 leikir)

2012-13: 21 mark (2 leikir)

2011-12: 22 mörk (4 leikir)