Kom Biden á óvart og sæmdi hann frelsisorðunni

Barack Obama, forseti Bandaríkjanna kom samstarfsmanni sínum, Joe Biden, varaforseta rækilega á óvart í kvöld er hann sæmdi hann æðstu frelsisorðu forsetaembættisins. CNN greinir frá.

Obama sagði að varaforsetinn fengi orðuna fyrir trú sína á samlöndum sínum, fyrir ást sína á landinu og fyrir ævilanga þjónustu við Bandaríkin. Biden, sem mætti í athöfnina ásamt eiginkonu sinni Jill Biden, hafði ekki hugmynd um hvað stæði til.

„Mig grunaði ekkert. Ég hélt við værum að koma hingað ásamt Michelle og Barack og nokkrum háttsettum starfsmönnum Hvíta  hússins til að skála fyrir þeirri vegferð sem þetta hefur verið“ sagði Biden sem varð afar hrærður þegar Obama tilkynnti að hann myndi hljóta þessa viðurkenningu.

Biden tók fram að þrátt fyrir þennan mikla heiður teldi hann að hann ætti Barack og öðru samstarfsfólki sínu mikið að þakka á þeirri vegferð sem síðastliðnu ár hefðu verið.