Ævintýri Shakespeare á enda

Leicester City var búið að vinna alla sex leiki sína undir stjórn Craig Shakespeare. Goodison Park var aftur á móti hindrunin sem Leicester komst ekki yfir.

Fyrri hálfleikurinn var ótrúleg skemmtun þar sem fyrsta markið kom á fyrstu mínútu. Það mark skoruðu heimamenn en það virtist eingöngu kveikja neistann hjá Leicester.

Kominn með 23 mörk á tímabilinu

Meistararnir svöruðu nefnilega með tveimur mörkum á sex mínútna kafla og komust yfir. Sveinar Shakespeare voru þó ekki lengi í paradís því Everton var komið í 3-2 fyrir hlé. Ótrúlegur hálfleikur.

Markahæsti leikmaður deildarinnar, Romelu Lukaku, afgreiddi síðan leikinn með sínu 23 marki í deildinni í vetur í síðari hálfleik.

Þessi sigur Everton var ekki síður merkilegur fyrir þær sakir að þetta var sjöundi heimaleikurinn í röð sem liðið vinnur.

„Við stóðum okkur mjög vel og þurfum að gera það sama er við spilum útileiki,“ sagði tveggja marka maðurinn, Romelu Lukaku.

„Við viljum berjast um sætin við Man. Utd og Arsenal. Þá verðum við að vinna fleiri leiki og ekki bara heimaleiki. Það var gott að spila með Ross Barkley í dag og hann bjó mikið til fyrir mig. Vonandi heldur þetta áfram hjá okkur.“

Erfiðir leikir framundan

Þau voru þung og leiðinleg skrefin hjá Shakespeare eftir leikinn enda alltaf ömurlegt er sigurhrina tekur enda. Ekki heldur besti undirbúningurinn fyrir Meistaradeildarleikinn gegn Atletico Madrid í vikunni.

„Það eru erfiðir leikir fram undan þannig að við megum ekki dvelja við þennan leik of lengi,“ sagði Shakespeare eftir leikinn.

„Ég var mjög ósáttur við hvernig við hófum þennan leik en sýndum karakter með því að koma til baka. Það var samt svekkjandi að tapa leiknum að lokum á föstum leikatriðum. Við ræddum saman eftir leikinn og vitum að við verðum að vera grimmari í föstu leikatriðunum.“

Shakespeare hristi aðeins upp í byrjunarliðinu fyrir leikinn en vildi ekki meina að það hafi komið niður á leik liðsins.

„Mér fannst það ekki trufla taktinn í leik liðsins. Við erum með sterkan hóp og ég hef mikla trú á öllum okkar leikmönnum. Við reyndum að vinna og verðum bara að sætta okkur við að það gekk ekki upp. Mér finnst ég hafa náð að setja mitt mark á liðið. Þetta er einstakur hópur leikmanna og ég hef aldrei unnið með drengjum sem hafa eins gott viðhorf og strákarnir í þessu liði.“