Dreifa bókum eftir kvenhöfunda í tilefni af alþjóðlegum baráttudegi kvenna

Ungmennaráð UN Women á Íslandi hefur tekið upp á því að dreifa bókum vítt og breytt um Reykjavík. Uppátækið er í tilefni af alþjóðlegum baráttudegi kvenna sem haldinn er hátíðlegur um allan heim í dag.

Bækurnar eiga það sameiginlegt að vera eftir kvenkyns höfunda, tengjast femínisma, sterkum konum eða kvenhetjum.

„Þetta er okkar leið til að halda upp á kvennadaginn, að fagna konum í bókmenntum,“ segir Alexandra Ýr van Erven, stjórnarmeðlimur í ungmennaráði UN Women, í samtali við Vísi.

„Þetta var verkefni sem Emma Watson gerði í New York og London. Hún semsagt fór í Subway systemið og var að skilja eftir á lestarstöðum og inni í lestum í þessum borgum. Þetta var það sem okkur langaði að endurgera í aðeins minni mynd og tækla þetta aðeins öðruvísi.“

Í bókunum má finna skilaboð frá ungmennaráðinu sem upplýsir fólk um hvað málið snýst og er meiningin að fólk skilji þær eftir á góðum stað að lestri loknum.

#konurskrifa #womensday #unwomen

A post shared by Snædís Arnardóttir (@snaepae) on Mar 8, 2017 at 3:39am PST

Auk þess mun spunahópurinn Improv Ísland halda sérstaka styrktarsýningu næstkomandi miðvikudag. 

„Okkur langaði að gera eitthvað skemmtilegt til að vekja athygli á starfinu og þetta átti í raun að vera til að bjóða fólk velkomið í starfið. Svo þróaðist þetta og úr var að þau ætla að halda sýningu í þjóðleikhúskjallaranum þar sem allur ágóðinn rennur til UN Women.“

Hægt er að nálgast miða á styrktarsýningu Improv Ísland og Ungmennaráðs UN Women á tix.is. Ungmennaráðið hvetur fólk að birta myndir af flökkubókunum á samfélagsmiðlum og nota myllumerkin #konurskrifa #unwomen og #womensday.