Hulda segir Jakob fegra sannleikann um Leikskólann 101

Hulda Björk Halldórsdóttir, móðir barns sem dvaldi á Leikskólanum 101, segir Jakob Frímann Magnússon, sem einnig átti barn á leikskólanum, fara mjög frjálslega með staðreyndir í gagnrýni sinni á lokun 101 haustið 2013.

Í grein sem Jakob ritaði í Fréttablaðið í gær lýsti hann upplifun sinni af lokuninni sem rekja má til ásakana um að börn hafi þar verið beitt harðræði.

Jakob segir að myndband sem lagt var fram í málinu, sem sýndi starfsmann leikskólans flengja barn, ekki hafa sýnt neitt saknæmt, hvað þá eitthvað sem réttlætti lokun skólans.

Hann bætir við að lokunin hafi valdið foreldrum barna á leikskólanum óþægindum sem þeir máttu „gjalda dýru verði.“ Segir hann að eigendur og starfsfólk skólans hafi beðið alvarlega hnekki á starfsheiðri sínum og trúverðugleika. Einu svörin sem hann hafi fengið á sínum tíma hafi verið að of mörg börn hafi verið vistuð á leikskólanum umfram leyfilegan kvóta og því hafi verið farið fram á lokun.

„Þó vissulega séum við sammála um að láta börnin okkar ávallt njóta vafans, gætum við hugsanlega lært eitthvað af ofangreindu um hvernig EKKI skyldi hrapa að niðurstöðum í málum af þessum toga,“ segir Jakob.

Útskýring í fjórum liðum

Þessari túlkun Jakobs hafnar Hulda alfarið í grein sem hún skrifar á Vísi í dag. Þar segir hún tónlistarmanninn fegra sannleikann - „svo ekki sé meira sagt.“

Hrekur hún rangfærslur Jakobs í fjórum liðum. Til að mynda bendir hún á að niðurstaða málsins hafi ekki verið sú að of mörg börn hafi verið á leikskólanum, eins og Jakob heldur fram.

„ Í bréfi sem okkur foreldrum leikskólans barst eftir lokun hans kom fram að sýnt þótti að annmarkar hafi verið á starfsemi Leikskólans 101 og að ómálga börn hafi verið beitt harðræði. Þar er einnig talið ámælisvert að eigandi leikskólans og stjórnandi hafi ekki haft yfirsýn með framkomu starfsmanna sinna við þau börn sem á leikskólanum dvöldu,“ segir Hulda sem vísar í álit Umboðsmanns barna máli sínu til stuðnings.

„Það getur verið að fólk sé ósammála um hvað teljist sem ofbeldi. Ég verð að segja það hér að ég er algjörlega ósammála að það sé í lagi af starfsfólki uppeldisstofnana, eða nokkrum öðrum, að dangla í, rassskella, bregða fæti fyrir, toga í fætur og draga eftir gólfi, beita börn harðræði eða ofbeldi á nokkurn hátt. Sama hversu erfiðar aðstæður þínar eru persónulega. Allt eru þetta lýsingar sem okkur foreldrum barnanna á leikskólanum voru gefnar. Dæmi nú hver sem vill.“

Grein Jakobs má nálgast í heild sinni hér og svargrein Huldu má finna með því að smella hérna.