Holtavörðuheiði lokuð næstu tímana: Þétt setið í Staðarskála

Stórhríð er nú allvíða á norðurhelmingi landsins og á veður enn eftir að versna austanlands. Búið er að loka Holtavörðuheiðinni og verður hún lokuð næstu tvo tímana að minnsta kosti.

Kjartan Atli Kjartansson, dagskrárgerðarmaður, var nýkominn í Staðarskála þegar Vísir náði tali af honum. Hann sagði að setið væri í öllum sætum í skálanum, bílastæðið væri fullt og að í skálanum væru björgunarsveitarmenn að tala við fólk og ráðleggja því.

Kjartan var á leiðinni suður frá Akureyri en hann sagði að færðin þaðan og í Staðarskála hafi verið mjög slæm, mikill skafrenningur og blint.

Samkvæmt vef Vegagerðarinnar er nú lokað á Holtvörðuheiði, Bröttubrekku, Laxárdalsheiði, Þverárfjalli, Hófaskarði, Mývatns- og Möðrudalsöræfum, Vopnafjarðarheiði og Fjarðarheiði.

Eins er lokað á Steingrímsfjarðarheiði en unnið að hreinsun.

Veginum frá Skeiðarársandi og austur að Jökulsárlóni hefur einnig verið lokað.