Velja bestu lið United og Liverpool sem þeir mættu á ferlinum

Enska úrvalsdeildin fer aftur af stað um helgina eftir landsleikjahlé. Stórleikur umferðarinnar fer fram á mánudagskvöldið þegar erkifjendurnir Liverpool og Manchester United eigast við á Anfield.

Sky Sports er búið að vera með mikla upphitun fyrir leikinn alla vikuna en kvöldið kalla þeir Rauða mánudaginn vegna hatursins á milli liðanna. Leikurinn verður í beinni útsendingu á Stöð 2 Sport HD.

Gary Neville, fyrrverandi leikmaður Manchester United, og Jamie Carragher, fyrrverandi leikmaður Liverpool, starfa í dag saman í þættinum Monday Night Football þar sem þeir fara yfir ensku úrvalsdeildina.

Þeir voru fengnir til að velja bestu leikmenn Liverpool og United í hverri stöðu sem þeir mættu á sínum ferli í úrvalsdeildinni og búa þannig til ellefu manna lið.

Besta United-liðið að mati Carragher: Peter Schmeichel; Gary Neville, Rio Ferdinand, Nemanja Vidic, Patrice Evra; Cristiano Ronaldo, Roy Keane, Paul Scholes, Ryan Giggs; Wayne Rooney, Ruud van Nistelrooy.

„Peter Schmeichel er besti markvörðurinn sem hefur spilað í ensku úrvalsdeildinni og kannski einn sá besti frá upphafi. Hann var allavega sá besti þegar ég spilaði og því er hann í liðinu,“ segir Carragher um danska markvörðinn.

„Þessi varnarlína í kringum 2007/2008 er ein sú besta sem við höfum séð í Evrópu. Saman komst hún í nokkra úrslitaleik Meistaradeildarinnar í röð og þetta miðvarðapar var klárlega það besta á þessum tíma,“ segir Carragher.

Liverpool-liðið að mati Gary Neville: Pepe Reina; Marcus Babbel, Stephen Henchoz, Sami Hyypia, Jamie Carragher; Steven Gerrard, Javier Mascherarno, Xabi Alonso, John Barnes; Michael Owen, Ferando Torres.

„Ef ég á að vera heiðarlegur hefur Liverpool aldrei verið með markvörð sem mér hefur fundist neitt sérstakur en ég vel Reina,“ segir Gary Neville um spænska markvörðinn en sóknarparið er ansi sterkt.

„Þessir tveir voru eldfljótir. Owen var rafmagnaður í tvö til þrjú ár með Liverpool, sérstaklega þegar hann spilaði úti vinstra megin á móti mér. Torres fannst mér heimsklassa leikmaður og á 2-3 ára tímabili með Liverpool var hann einn besti framherji heims,“ segir Gary Neville.

Alla úttekina má finna hér.