Mannræninginn í Suður-Karólínu játaði á sig sjö morð

Bandarískur maður sem var handtekinn eftir að kona fannst hlekkjuð í gámi við skelfilegar aðstæður á landareign hans hefur játað að hafa framið sjö morð. Lögregla hefur fundið þrjú lík grafin á landareigninni, meðal annars lík unnusta konunnar sem maðurinn hélt fanginni.

Málið hefur vakið mikinn óhug í Bandaríkjunum, en fjölmiðlar fjölluðu töluvert um hvarf þeirra Kölu Brown og Charles Davids Carver í ágúst síðastliðnum. Það var ekki síst vegna þess að svo virtist sem mannræninginn hefði komist inn á Facebook-síðu Carvers og sent fjölskyldumeðlimum parsins skilaboð þar sem því var haldið fram að það væri í lagi með þau.

Það var svo á fimmtudag sem lögregluyfirvöld í Suður-Karólínu fundu hina þrjátíu ára gömlu Kölu Brown, eftir að hafa fengið ábendingu um öskur úr flutningagámi á landareigninni. Hún var í miklu áfalli er hún fannst í gámnum. Hún var hlekkjuð með keðju um hálsinn eins og hundur, að sögn lögregluyfirvalda. Aðstæður í gámnum voru skelfilegar, þar var gluggalaust, ekkert ljós og engin loftræsting.

Todd Kohlhepp, dæmdur kynferðisafbrotamaður og eigandi landsins þar sem Brown fannst, var svo handtekinn í tengslum við málið. Konan er talin hafa unnið fyrir Kohlhlepp, sem er skráður fasteignasali, en komið hefur í ljós að hann hefur áður verið dæmdur fyrir mannrán.

Brown tjáði lögreglunni eftir að hún var leyst úr prísundinni að að sig grunaði að fjögur lík væru á eigninni, og að hún hefði séð mannræningjann skjóta unnusta sinn til bana. Í gær fannst fyrsta líkið á landareigninni og hefur lögregla nú staðfest að það sé lík Carvers.

Kohlhepp játaði meðal annars í nótt að hafa skotið til bana fjórar manneskjur í mótorhjólabúð í grennd við borgina Spartanburg árið 2003. Chuck Wright, lögreglustjóri sem fer með rannsókn málsins, útilokar ekki að Kohlhepp hafi myrt fleiri og er yfirheyrslum og rannsókn málsins hvergi nærri lokið.