Kona fannst „bundin eins og hundur“ við húsleit í Suður-Karólínu

Lögregla í Suður-Karólínu í Bandaríkjunum fann konu, sem hefur verið saknað frá í ágúst, við húsleit í vikunni. Einnig fann lögreglan óþekkt lík. Enn er verið að leita á svæðinu til að ganga úr skugga um að ekki sé um raðmorðingja að ræða.

Lögreglan hefur handtekið Todd Kohlhepp, 45 ára gamlan kynferðisbrotamann, í tengslum við málið.

Ekki hefur enn náðst að bera kennsl á líkið, en konan segist hafa séð fangara sinn skjóta kærasta sinn til bana.

Konan fannst á fimmtudag eftir að lögreglan heyrði öskur úr flutningagámi í Woodruff, sem er um 128 kílómetra frá Columbia, höfuðborg Suður-Karólínu.

Áður dæmdur fyrir mannrán

Konan, sem var í miklu áfalli, fannst í gámnum með keðju um hálsinn og er talin hafa verið þar í um tvo mánuði. Hún sagði lögreglu að fjögur lík væru líklegast á eigninni. Konan er talin hafa unnið fyrir Kohlhlepp, sem er skráður fasteignasali.

Chuck Wright, lögreglustjóri í Spartanburg sýslu, sagði að konan hafi þurft að þola hræðilegar aðstæður.

„Við erum að reyna að ganga úr skugga að ekki sé um raðmorðingja að ræða, það er mjög líklegt miðað við þær upplýsingar sem við höfum,“ sagði Wright í samtali við fjölmiðla.

Lögreglan fékk ábendingu um að eitthvað gruggugt væri á seyði á eigninni frá rannsóknarmanni kynferðisbrota. Lögreglan hefur einnig lagt hald á byssur og önnur skotvopn sem fundust við leitina. Kohlhepp hefur áður verið dæmdur fyrir mannrán.