Quarashi mun spila í Eyjum og fordæma allt ofbeldi

„Jú, auðvitað höfum við fylgst með umræðunni eins og allir aðrir,“ segir Sölvi Blöndal meðlimur í hljómsveitinni Quarashi.

Quarashi verður helsta tónlistaratriðið á Þjóðhátíð í Eyjum þetta árið. Undanfarna daga hefur farið fram heit umræða sem má rekja til þeirrar ákvörðunar Páleyjar Borgþórsdóttur lögreglustjóra í Eyjum, að taka kynferðisbrot út fyrir sviga og tilkynna ekki um neitt slíkt fyrir en eftir hátíðina. Elliði Vignisson bæjarstjóri hefur lýst yfir stuðningi við þá ákvörðun, en ýmsir fagaðilar, svo sem Stígamót, hafa harðlega gagnrýnt þetta ráðslag. Rauður þráður í baráttunni gegn nauðgunum hefur verið sá að aftabúvæða þær; að fjallað sé um þær sem og önnur brot. Með eðlilegum fyrirvörum.

Quarashi lætur til sín taka í baráttunni gegn nauðgunum

Árið 2011 kom Quarashi fyrsta sinni fram á útihátíð; Bestu útihátíðinni sem haldin var á Hellu. Þeir vöktu þá athygli fyrir yfirlýsingar þess efnis að ef upp kæmu slík tilvik, þá myndu þeir ekki spila. Þeir kröfðust þess að Nei-hópurinn yrði á staðnum og þá gáfu þeir Stígamótum hálfa milljón í tengslum við atburðinn.

„Ástæðan fyrir að við gerðum þetta þá var sú að þá hafði árum og áratugum saman viðgengist ómenning á þessum hátíðum. Ömurlegheit og kynferðisofbeldi. Við vorum að koma fram á slíkri hátíð í fyrsta skipti og við vildum segja okkar skoðun, sem við gerum annars sjaldan. Svona á þetta ekki vera. Og við vildum fá aðila á staðinn sem þekktu þetta langsamlega best. Fá sérfræðingana á staðinn,“ segir Sölvi í samtali við Vísi.

Útihátíðarkúltúr var ömurlegur

Hann segir afstöðu þeirra ekkert hafa breyst, hún stendur og mun standa. Sölvi telur þessa umræðu meira í deiglunni nú en var árið 2011.

„Fyrir okkar parta, fyrir mína parta, var útihátíðakúltúr á Íslandi ömurlegur. Mikilvægt er að þeir sem halda slíkar hátíðir gefi út að slíkur ofbeldiskúltúr verði ekki liðinn. Eitt ofbeldisverk er einu ofbeldisverki of mikið. Fyrir listamenn að koma fram og að slíkt sé talinn eðlilegur fylgifiskur slíkra hátíða er óboðlegt. Það rak okkur af stað í þessu á sínum tíma.“

Ekki komið til tals að draga sig út

Nú geisar heit umræða um það hvernig Eyjamenn vilja taka á þessum málum; þeir eru sakaðir um þöggun. Hefur komið til tals, innan ykkar raða, að draga ykkur út úr þessu?

„Nei, en við höfum verið fullvissaðir um það af hátíðarhöldurum að öryggi gesta verði haft í fyrirrúmi. Þetta er nokkuð sem skiptir okkur verulega miklu máli. Við erum stoltir af því sem við gerðum 2011. Sú hátíð tókst gríðarlega vel og ekkert kynferðisbrot var tilkynnt á þeirri hátíð. Það er mikilvægt að listamenn og þeir sem standa að slíkum hátíðum sendi út slík skilaboð. „No tollerance“ gagnvart ofbeldi.“