Sjö af níu umdæmum svara fjölmiðlum

Öll lögregluumdæmin fyrir utan tvö hafa þær verklagsreglur að upplýsa fjölmiðla um fjölda kynferðisbrota sem tilkynnt hafa verið til lögreglu ef óskað er eftir því.

Einungis á Suðurlandi og í Vestmannaeyjum er upplýsingunum haldið frá fjölmiðlum þar til lögregla metur tímabært að gefa þær upp.

Í Fréttablaðinu í gær var sagt frá því að lögreglan í Vestmannaeyjum myndi ekki upplýsa fjölmiðla jafnóðum um tilkynnt kynferðisbrot á Þjóðhátíð. Upplýst verði um brotin þegar lögreglan telur það tímabært. Páley Borgþórsdóttir lögreglustjóri sagði þetta gert til að tryggja rannsóknarhagsmuni og velferð brotaþola þessa helgi, og gildi þá einu hver vilji fjölmiðla sé.

Sé ekki almannahætta

Í samtali við fréttastofu sagði Páley að tilkynnt væri um fjölda fíkniefnamála og líkamsárása á almannafæri enda væri um almannahættu að ræða. Það ætti yfirleitt ekki við um kynferðisafbrot.

„Flest þessara brota eiga sér stað á milli tveggja einstaklinga í lokuðum rýmum þangað sem fólk fer yfirleitt sjálfviljugt. Það er bara staðreyndin,“ sagði Páley í fréttum Stöðvar 2 í gær.

Einnig sagði Páley viðtekna venju hjá lögreglunni og viðbragðsaðilum kynferðisbrotamála að upplýsa ekki um fjölda kynferðisbrota.

Sjá einnig: Lögreglustjóri telur að fólk leggi saman tvo og tvo

Í gær kom aftur á móti fram í blaðinu að neyðarmóttakan á Landspítalanum hefði þá reglu að svara alltaf fyrirspurnum fjölmiðla. Fréttastofa hafði einnig samband við lögregluumdæmin í kjölfar ummælanna og þá kom í ljós að einungis lögregluumdæmið á Suðurlandi tekur í sama streng og lögreglustjórinn í Vestmannaeyjum.

Oddur Árnason, yfirlögregluþjónn á Suðurlandi, segir rannsóknarhagsmuni ráða því hvort fjölmiðlar séu upplýstir um kynferðisbrot í umdæminu og ef svo beri undir segi lögreglan ekki rétt frá.

„Í flestum tilfellum eru ekki veittar upplýsingar um slík brot fyrr en ákærur hafa verið gefnar út. Ef fréttamenn spyrja hvort kynferðisbrot hafi verið framin og lögreglan telur það stangast á við rannsóknarhagsmuni, svarar hún neitandi,“ segir hann.

Sjá einnig: Langflest lögregluumdæmi upplýsa fjölmiðla um kynferðisbrot

Svara fyrirspurnum um alla glæpi

Lögregluþjónar og lögreglustjórar í öðrum lögregluumdæmum, utan Suðurlands og Vestmannaeyja, sem fréttastofa ræddi við voru aftur á móti sammála um að svara fyrirspurnum fjölmiðla.

Verklagsreglurnar eru almennt þær að tilkynna ekki sérstaklega um kynferðisbrot en sé leitað eftir upplýsingum er fjöldi tilfella gefinn upp án þess þó að upplýsa um rannsóknarhagsmuni. Þannig séu tilkynningar um kynferðisbrotamál meðhöndlaðar á sama hátt og aðrar tilkynningar um brot eða glæpi.

Hlynur Hafberg Snorrason, yfirlögregluþjónn á Vestfjörðum, segir fyrirspurnum fjölmiðla svarað allt árið um kring óháð því hvort það sé í kringum útihátíðir. „Upplýst er um kynferðisbrot líkt og aðra glæpi sem eiga sér stað í umdæminu,“ segir hann.

Gunnar Jóhannes Jóhannsson, lögreglufulltrúi rannsóknardeildar hjá lögreglunni á Norðurlandi eystra, segir fjölmiðlum veittar upplýsingar um öll mál sem koma upp óski þeir eftir því. „Þannig er það allt árið um kring en í umdæminu eru haldnar margar útihátíðir, svo sem Mærudagar, Bíladagar, Fiskidagurinn mikli og Ein með öllu um verslunarmannahelgina,“ segir hann.

Þess má geta að á áttunda tug úti- og bæjarhátíða eru haldnar um allt land, frá apríl til nóvember ár hvert. Hátíðirnar dreifast á öll lögregluumdæmin.

Fréttin birtist fyrst í Fréttablaðinu 20. júlí