Bandarískur hermaður felldur með vegasprengju

Bandarískur hermaður lét lífið og sjö særðust, þar á meðal einn Bandaríkjamaður, í vegasprengju í Helmand héraði í Afganistan í dag. Sprengjan sprakk þegar nokkrir hermenn voru á leið til aðstoðar heimamanna gegn Talibönum sem tóku stóran hluta héraðsins í fyrra. Um hundrað bandarískir hermenn berjast þar nú.

Talibanar sóttu hart fram þar í fyrra og neyddu afganska herinn til að yfirgefa herstöðvar og vegatálma.

Héraðið er mikilvægt Talibönum því þar fer stór hluti ópíumframleiðslu þeirra fram. Samkvæmt Washington Post stjórna Talibanar rúmum helmingi héraðsins og hafa harðir bardagar staðið yfir þar á síðustu vikum.

Þetta er í annað sinn á árinu sem að Bandaríkjamaður lætur lífið í Afganistan.