Ímynd og orðspor FIFA gæti ekki verið verra

Það styttist í forsetakjör FIFA en að öllu óbreyttu fer það fram á föstudag og um leið lýkur valdatíma Sepp Blatter.

Prins Ali frá Jórdaníu hefur reyndar farið fram á frestun á kjörinu en ólíklegt þykir að sú seinkun nái í gegn.

Maðurinn sem KSÍ styður, Gianni Infantino, segir að það sé núna eða aldrei fyrir FIFA að taka til í sínum herbúðum.

„Við höfum öll séð síðustu mánuði hvað er í gangi hjá FIFA.  Ímynd og orðspor FIFA gæti ekki verið verra. Það þarf að gera eitthvað í þessu og það strax,“ sagði Infantino.

„Ef við bregðumst ekki við núna þá sé ég ekki að FIFA eigi nokkra framtíð.“