Illugi hættir á þingi

Illugi Gunnarsson menntamálaráðherra hefur ákveðið að gefa ekki kost á sér til áframhaldandi þingsetu. Þetta kemur fram í yfirlýsingu á Facebook-síðu ráðherrans en framboðsfrestur fyrir prófkjör Sjálfstæðisflokksins í Reykjavík rennur út í dag.

Fjölmiðlar hafa seinustu vikur ítrekað reynt að ná tali af ráðherranum til að spyrja hann út í framtíð hans í stjórnmálum en ráðherrann hefur ekkert viljað gefa upp fyrr en með þessum hætti nú. Þannig svaraði hann ekki spurningunni um hvort hann ætlaði fram á ný í gær þegar hann sat fyrir svörum í beinni á Facebook-síðu Sjálfstæðisflokksins.

Tók sér leyfi frá þingstörfum vegna Sjóðs 9

Illugi var fyrst kjörinn á þing fyrir sjálfstæðismenn árið 2007. Hann náði svo aftur kjöri í kosningunum vorið 2009 en í apríl 2010 tók Illugi sér leyfi frá þingstörfum þar sem rannsókn stóð yfir á starfsemi sjóða Glitnis á árunum fyrir hrun en Illugi í stjórn eins af fjárfestingasjóðum bankans, Sjóðs 9.

Illugi hefur verið mennta-og menningarmálaráðherra síðan 2013 en nokkur styr hefur staðið um ráðherrann, ekki síst eftir að tengsl hans við fyrirtækið Orku Energy komust í hámæli fyrir rúmu ári. Illugi starfaði fyrir fyrirtækið á þeim tíma sem hann var utan þings og þóttu ýmsum það orka tvímælis að fulltrúar fyrirtækisins hefðu tekið þátt í dagskrá vinnuferðar ráðherrans til Kína í mars í fyrra.

Ekkert fararsnið á ráðherranum í október í fyrra

Í apríl upplýsti svo ráðherrann að hann leigði hús sitt af Hauki Harðarsyni stjórnarformanni Orku Energy en Illugi þvertók fyrir það í föstudagsviðtali Fréttablaðsins í október fyrra að hann hefði gert fyrirtækinu einhverja greiða í starfi sínu sem ráðherra. Í viðtalinu var hann líka spurður út í það hvort hann væri á útleið í stjórnmálunum og sagði:

„Það er ekkert fararsnið á mér. Meðan ég hef enn gaman af stjórnmálum þá ætla ég mér að vera í þeim. Daginn sem mér fer að finnast þetta leiðinlegt eða einhver byrði þá held ég að ég myndi skjótt skipta um starfsvettvang. Þá er til nóg af öðru fólki til að vinna þessa vinnu.“

Í yfirlýsingu hans í dag segir hins vegar:

„Allt frá því ég kom heim frá námi árið 2000 hafa stjórnmál verið megin viðfangsefni mitt og ég hef starfað sem aðstoðarmaður forsætisráðherra og utanríkisráherra, gegnt þingmennsku, verið þingflokksformaður og nú síðast ráðherra.

Þessi tími hefur verið sérstakur í þjóðarsögunni, tími mikilla átaka og stórra atburða sem marka munu íslenskt samfélag til framtíðar.

Ég er mjög þakklátur fyrir það tækifæri sem ég hef fengið til að taka virkan þátt í þjóðfélagsumræðunni og sérstaklega vil ég þakka öllum þeim sem hafa stutt mig með ráðum og dáð á undanförnum árum, bæði í prófkjörum sem og í stjórnmálastarfinu almennt.“

Kveður stjórnmálin sáttur

Þá segir ráðherrann jafnframt að það sé mat hans nú að hann standi á þeim tímamótum að hann haldi annað hvort áfram í stjórnmálum og geri þau að ævistarfi eða snúi sér að öðrum verkefnum.

„Í ljósi þessa hef ég komist að þeirri niðurstöðu að um það bil 16 ára vera á sviði stjórnmálanna sé nægjanleg, a.m.k. að sinni og að skynsamlegast og áhugaverðast fyrir mig sé að leita nýrra áskoranna á öðrum vettvangi.

Ég mun kveðja stjórnmálin sáttur, en vissulega með nokkrum söknuði. Um leið hlakka ég til að takast á við ný verkefni, hver sem þau kunna að verða.“