Hefja neðansjávarleit að EgyptAir flakinu

Leit neðansjávar að flaki farþegaflugvélar EgyptAir sem fórst á Miðjarðarhafi hefst á næstu dögum. Merki frá staðsetningarsendum vélarinnar hefur fundist og franskt leitarskip er á leiðinni á svæðið en skipið lagði úr höfn á Korsíku í gær.

66 voru um borð í vélinni þegar hún fórst á leið sinni frá París til Kairó í Egyptalandi. Brak úr vélinni hefur þegar fundist en sjálfur skrokkurinn og flugritarnir eru hinsvegar ófundnir. Talið er að nú verði hægt að þrengja leitarsvæðið þannig að leitin fari fram á svæði sem er fimm kílómetrar í radíus.