Segja sjúkraflug liggja niðri „af mannavöldum“

Beina þurfti sjúkraflugi frá Hornafirði til Akureyrar þar sem Reykjavíkurvöllur hefur verið ófær í dag. Um var að ræða forgangsflug en Flugmálafélag Íslands segir sjúkraflug liggja niðri af mannavöldum.

„Engin sjúkraflugvél gat lent á vellinum þar sem búið er að loka þeirri flugbraut sem nýtist í stormi úr suðvestri og er í daglegu tali nefnd Neyðarbrautin. Brautin er þó enn á sínum stað og í góðu ástandi. Aðeins stjórnmálamenn standa í vegi fyrir lendingum á brautinni,“ segir í ályktun sem stjórn félagsins sendi á fjölmiðla í kvöld.

Þar kemur fram að meðlimir stjórnarinnar muni ekki eftir jafn alvarlegri stöðu í flugsamgöngum innanlands og hafi komið fram í dag.

„Ljóst er að varnaðarorð flugstjóra og sérfræðinga í flugmálum áttu við full rök að styðjast og að stjórnmálamenn hafa gert alvarleg mistök með því að loka Neyðarbrautinni.“

Félagið kallar eftir því að Neyðarbrautin verði opnuð á ný og segir að það muni ekki kosta ríkissjóð neitt. Alþingi geti tekið ákvörðun um að opna brautina þegar í stað.

„Flugmálafélagið hvetur nýtt þing til þess að bregðast við tafarlaust áður en það verður um seinan og án þess að það hafi þá kostað mannslíf.“