Flutningar fólks frá Aleppo halda áfram

Flutningar almennra borgara og uppreisnarmanna frá Aleppo er hafinn að nýju og fóru að minnsta kosti 350 manns frá austurhluta borgarinnar seint í gærkvöldi.

Áður hafði verið gert hlé á flutningunum vegna þess að kveikt var í rútum sem áttu að flytja fólk úr öðrum nærliggjandi bæjum, sem lúta stjórn stuðningsmanna Bashar al-Assads forseta en eru umkringdir af uppreisnarmönnum.

Þúsundir bíða þess að komast frá austurhluta Aleppo og hafast þar við í slæmum aðstæðum enda er sá hluti borgarinnar í rúst.

Í frétt BBC segir að í hópi þeirra sem hafa verið fluttir úr austurhluta Aleppo sé hin sjö ára Bana Alabed sem hefur verið virk á Twitter og greint frá hörmulegum aðstæðum fólks í borginni.

Öryggisráð Sameinuðu þjóðanna munu í dag ræða hvort að senda beri eftirlitsmenn til að fylgjast með fólksflutningunum.

Uppreisnarmenn hafa ráðið yfir austurhluta Aleppo frá árinu 2012, en stjórnarherinn hefur á síðustu dögum náð tökum á borginni allri á nýjan leik.

Talsmaður mannréttindasamtakanna Syrian Observatory for Human Rights segir að fimmtíu rútur séu nú til taks til að flytja allt að þrjú þúsund manns úr austurhlutanum.