Skæruhernaður ISIS í Mosúl reynist stjórnarhernum erfiður

Hryðjuverkasamtökin ISIS beitir hefðbundnum skæruhernaði þar sem þeir verjast sókn írakskra og kúrdískra öryggissveita að Mosúl. Liðsmenn ISIS notast við undirgöng undir götum Mosúl og ræðst gegn öryggissveitunum í fámennum hópum.

Þessi aðferð ISIS-liða hefur reynst írakska og kúrdíska hernum erfið. „Þetta er á góðri leið með að snúast upp í martröð,“ segir ónafngreindur írakskur hershöfðingi í samtali við Reuters. Hann segir svo gott sem ómögulegt að skilja ISIS-liða frá almennum borgurum þar sem ISIS hefur skipað almennum borgurum að klæða sig líkt og ISIS-liðar, það er í hefðbundnum íslömskum klæðnaði og með alskegg.

„Hermenn okkar uppgötva þá ekki fyrr það er orðið of seint, þegar árásarmaðurinn hefur annað hvort sprengt sjálfsvígsvesti sitt eða kastað handsprengju,“ segir hershöfðinginn.

Tuttugu sinnum fleiri

Um 100 þúsund hermenn sækja nú að borginni sem hefur verið á valdi ISIS síðan júní 2014. Um er að ræða liðsmenn írakska stjórnarhersins, sveita Kúrda og sjíamúslima. Talið er að um fimm þúsund ISIS-liðar hafist enn við í Mosúl sem er næststærsta borg Íraks.

Þrátt fyrir að vera um tuttugu sinnum færri þá hafa ISIS-liðarnir veitt harða mótspyrnu. Þannig missti hershöfðinginn sem rætt er við þrjú brynvarin farartæki í átökum einn og sama daginn fyrr í vikunni.

Gangnanetið um sjötíu kílómetrar

Hisham al-Hashimi, ráðgjafi Íraksstjórnar, segir að ISIS-liðar hafi grafið göng undir borgina allt frá því að þeir náðu yfirráðum í borginni fyrir rúmum tveimur árum. Gangnanetið í austurhluta borgarinnar er talið vera samtals um 70 kílómetra langt. Fara liðsmenn ISIS um göngin, fara upp á yfirborðið og ráðast gegn andstæðingum sínum um miðja nótt. Erfitt hefur reynst fyrir stjórnarherinn að taka á þessum árásum.

Írakski herinn hefur náð stjórn á tveimur hverfum borgarinnar sem hann náði á sitt vald í síðustu viku. Þá hefur hann sótt inn í fimm hverfi til viðbótar en þar er enn barist.