„Þetta eru vandamál sem enginn hefur þorað að tala um“

„Þetta eru vandamál sem eru búin að vera til staðar en enginn hefur þorað að tala um", segir formaður ungmennaráðs Breiðholts um skýrslu Rauða Krossins um slæma stöðu fátækra barna í hverfinu. Formaður íbúasamtakanna Betra Breiðholt segir niðurstöðurnar sláandi, en að þær komi þó ekki á óvart.

Í skýslunni segir meðal annars að í Efra-Breiðholti búi börn sem sum hver hafa fengið fátækt og félagslega einangrun í arf, börn sem missa heilu veturna úr grunnskóla og eiga erfitt með að fóta sig í kerfinu. 

„Ég get ekki sagt að þetta komi okkur á óvart. Þetta er bara staðreynd og raunveruleiki sem við búum við. Við þurfum bara að takast á við hann," segir Jóhanna Dýrunn Jónsdóttir formaður íbúasamtakanna Betra Breiðholt. 

Snorri Freyr Vignisson, sem situr í ungmennaráði Breiðholts, tekur í sama sama streng.

„Þetta kemur mér ekki á óvart og í raun er bara frekar fúlt að það komi upp óp og að fólk sé hissa. Þetta er vandamál sem er búið að vera til staðar en enginn hefur þorað að tala um," segir hann.

Félagsleg einangrun barnanna sem fjallað er um í skýrslunni er sérstaklega sláandi að mati bæði Jóhönnu og Snorra.

„Að það séu börn hérna í hverfinu sem geta ekki stundað nám af því að þau eiga ekki samstað í skóla eða frístund. Að setja sig í spor þessara foreldra er hrikalegt. Að ímynda sér það að barninu sínu líði það illa í skólanum að það geti ekki verið þar, við myndum aldrei sætta okkur við það og það ætti enginn að gera það. Fjárhagslegur hluti skýrslunnar hefur fengið miklu þyngra vægi en andleg og félagsleg staða þessa fólks," segir Jóhanna. 

Ungmennaráð Breiðholts stendur nú að verkefni þar sem börn hjálpa samnemendum sínum af erlendum uppruna að aðlagast hér á landi. Snorri gekk sjálfur í grunnskóla í Breiðholti.

„Mér finnst að grunnskólar í Breiðholti mættu taka það til sín að það eru alltof mikið af börnum sem eru ekki að ná að mynda tengsl við samnemendur sína útaf tungumálaerfiðleikum og menningarlegum erfiðleikum. Það er eitt vandamál sem þarf að taka tillit til og fagna fjölbreytileikanum. Halda upp á hátíðir annarra og tungumál þeirra," segir Snorri. 

„Þessi skýrsla er í sjálfu sér neikvæð en við getum líka litið á þetta sem jákvætt tækifæri til að styrkja okkur sem samfélag og vinna betur saman," segir Jóhanna Dýrunn Jónsdóttir.