Umgengnisforeldrar enn óskráðir

Umgengnisforeldrar eru enn óskráðir í Þjóðskrá og þar með formlega barnlausir þrátt fyrir að þingsályktunartillaga sem samþykkt var á Alþingi árið 2014 hafi krafist þess að búið væri að skrá foreldrana fyrir 1. janúar 2016.

Sameiginleg forsjá foreldra yfir börnum sínum eftir skilnað er að verða æ algengara fjölskyldumynstur. Það foreldri sem hefur lögheimili barns hefur rétt til að ráða alfarið búsetu barnsins innanlands, val á grunnskóla og leikskóla sem og að hljóta allar barnabætur vegna barnsins eða barnanna og svo framvegis. Þessi réttindi fylgja lögheimilisforeldri þrátt fyrir að barn búi á heimilum beggja foreldra jafnt. Umgengnisforeldri er hins vegar skráð barnlaust í þjóðskrá og öllum kerfum sem byggja á henni.

Tillaga Bjartrar framtíðar um skráningu foreldranna var samþykkt með yfirgnæfandi stuðningi sextíu þingmanna í maí 2014 og sagði þar að verkefnið ætti að vera komið í gagnið eigi síðar en 1. janúar 2016. Skráningin væri fyrsti liður í stærri áætlun um að tvöfalda lögheimili barna.

„Það er búið að gera heilmikið í að benda á hvað þarf að koma til svo hægt sé að skrá umgengnisforeldri. Það þarf að formgera svona verkefni en ráðuneytin þurfa að gera það sjálf sem ekki hefur gerst. Það hefur heldur ekkert breyst í löggjöf eða slíkt,“ segir Margrét Hauksdóttir, forstjóri Þjóðskrár.

Guðmundur Steingrímsson, fyrsti flutningsmaður tillögunnar, undrast seinaganginn. „Það er glatað að vera foreldri barns en vera ekki skráður í opinberri skráningu. Þetta er hópur sem núna er ekki að njóta neinna bóta eða aðstoðar til að annast börn sín. Ég held að þarna sé hópur sem hefur það einna verst í okkar samfélagi.“

Birgir Grímsson, formaður Félags um foreldrajafnrétti, segir lengi hafa lítið þokast í öllum málum er varða foreldrajafnrétti. „Það er gríðarlega mikill fjárhagslegur mismunur á milli foreldra byggt á því hvort annað foreldrið hafi lögheimilið eða ekki.“ 

Fréttin birtist fyrst í Fréttablaðinu