Gylfi Þór er betri en Rooney, Martial, Barkley, Ramsey og Milner

Enska dagblaðið The Mirror er búið að velja 50 bestu leikmenn ensku úrvalsdeildarinnar í fótbolta en niðurtalningin hófst í gær þegar leikmenn í sætum 50-41 voru kynntir til leiks.

Þar á meðal er íslenski landsliðsmaðurinn Gylfi Þór Sigurðsson, leikmaður Swansea, en hann er 41. besti leikmaðurinn í ensku úrvalsdeildinni að mati The Mirror.

Gylfi Þór, sem er búinn að skora tvö mörk fyrir velska liðið á tímabilinu, er sagður skora eða leggja upp mark í þriðja hverjum leik í úrvalsdeildinni síðan hann kom fyrst til Swansea í janúar 2012 á láni frá Tottenham.

„Þó Svanirnir séu í vandræðum efast enginn um gæði Gylfa. Hann er oftast maðurinn sem skiptir sköpum fyrir liðið. Leroy Fer hefur farið ágætlega af stað fyrir Swansea en Gylfi er besti leikmaður liðsins,“ segir í umsögn um Gylfa Þór á heimasíðu Mirror.

Fyrir ofan gamlan samherja

Gylfi má vel við una með sitt sæti á listanum en hann er fyrir ofan markahæsta leikmann enska landsliðsins frá upphafi, Wayne Rooney, og Anthony Martial, samherja Rooney hjá Manchester United, sem kostaði ríflega 30 milljónir punda.

Hafnfirðingurinn er einnig fyrir ofan Ross Barkley, einn besta leikmann enska landsliðsins í dag sem spilar fyrir Everton, Walesverjann Aaron Ramsey, leikmann Arsenal, sem var í úrvalsliði EM og James Milner, leikmann Liverpool.

Þá er Gylfi Þór einnig fyrir ofan Ashley Williams, fyrrverandi samherja sinn hjá Swansea, en miðvörðurinn stakk af til Everton í sumar. Gylfa bauðst reyndar líka að fara til Everton en félagið bauð 25 milljónir punda í íslenska miðjumanninn sem ákvað frekar að semja aftur við Swansea.

Leikmenn í sætum 50-41:

41. Gylfi Þór Sigurðsson, Swansea

42. James Milner, Liverpool

43. Ashley Williams, Everton

44. Aaron Ramsey, Arsenal

45. Ross Barkley, Everton

46. Anthony Martial, Manchester United

47. Steven Davis, Southampton

48. Granit Xhaka, Arsenal

49. Jonny Evans, West Bromwich Albion

50. Wayne Rooney, Manchester United