Hungurlús fyrir kosningar

Nýlega gaf ég út bók, Bætum lífi við árin. Baráttan fyrir bættum kjörum aldraðra og öryrkja. Greinasafn. Eins og nafnið bendir til er hér um greinasafn að ræða. Þetta er úrval þeirra greina, sem ég hef skrifað sl. 12 ár. Alls hef ég skrifað rúmlega 600 greinar á þessu tímabili, flestar um kjaramál aldraðra og öryrkja. Í eftirmála bókarinnar segi ég þetta: Ástandið í kjaramálum aldraðra og öryrkja er enn þannig, að sá lífeyrir, sem stjórnvöld skammta þeim, sem einungis hafa tekjur frá almannatryggingum, dugar ekki fyrir framfærslukostnaði. Væntanlega gerir ríkisstjórnin eitthvað í málinu fyrir alþingiskosningarnar 29. október 2016. Ég óttast, að það verði eins og oft áður aðeins einhver hungurlús.

 

Því miður rættist þessi spá. Ríkisstjórnin spilaði út hungurlús til aldraðra nú rétt fyrir kosningar. Ég kalla það hungurlús, þegar ríkisstjórnin ákveður að láta þá, sem verst eru staddir, fá 17 þúsund króna hækkun eftir skatt , þegar þeir eru búnir að bíða í níu mánuði í ár og þurftu að bíða í átta mánuði sl. ár frá því aðrar stéttir fengu miklar kauphækkanir. Launafólk fékk 14,5% hækkun á lágmarkslaunum 2015 og flestar aðrar stéttir fengu þá miklar kauphækkanir, sumar miklu meira. Ríkisstjórnin sagði alltaf við aldraða og öryrkja, að þeir yrðu að bíða. Hvers vegna? Ég tel, að aldraðir og öryrkjar hefðu frekar átt að fá hækkanir á undan öðrum; ekki að bíða og fá átta mánuðum síðar en aðrir minni hækkun eða 9,7% hækkun miðað við 14,5% hækkun sem launafólk fékk.

 

Nú segir ríkisstjórnin, að lífeyrir aldraðra einhleypinga hækki í 280 þúsund á mánuði fyrir skatt um næstu áramót; í 224 þúsund krónur eftir skatt. Þessi lífeyrir er í dag 207 þúsund krónur á mánuði. Hér er um 17 þúsund króna hækkun að ræða eftir skatt. Það eru öll ósköpin. Þetta nær ekki einu sinni þeirri hækkun sem stjórnarflokkarnir lofuðu öldruðum, og öryrkjum í kosningaloforði til leiðréttingar á lífeyri vegna kjaragliðnunar krepputímans; til þess að efna það loforð þarf að hækka lífeyri um kr 56.580 og lífeyrir færi í 302 þúsund kr. á mánuði fyrir skatt, í 242 þúsund eftir skatt.

 

Aðalatriðið er hvað aldraðir og öryrkjar þurfa sér til framfærslu. Ég tel, að eina viðmiðunin í því efni sé neyslukönnun Hagstofunnar. Samkvæmt henni er meðaltalsneysla einhleypinga 321 þúsund krónur á mánuði. Það er án skatta. Ég tel því lágmark 321 þúsund krónur á mánuði eftir skatt fyrir einhleypan eldri borgara og öryrkja.

Þessi grein birtist fyrst í Fréttablaðinu.