Samræmd könnunarpróf í rafrænu formi - lykiláfangi í nútímavæðingu skólakerfisins

Fyrstu rafrænu prófin í íslensku og stærðfræði verða lög fyrir 4. og 7. bekk grunnskólans síðar í þessum mánuði. Þau marka fyrstu skrefin í viðamikilli innleiðingu samræmdra könnunarprófa í rafrænum búningi sem er lykiláfangi í nútímavæðingu skólakerfisins hérlendis.

Í desember 2015 fékk Menntamálastofnun þau tilmæli frá mennta- og menningarmálaráðuneyti að formlega skyldi hefja undirbúning að innleiðingu samræmdra könnunarprófa í rafrænu formi, bæði í 4. og 7. bekk og á unglingastigi. Þetta viðamikla verkefni útheimtir langatímasýn allra aðila skólakerfisins. Fullklárað mun það skila sér í bættri þjónustu við nemendur og kennara, til að mynda með skjótari og skilvirkari einkunnagjöf, nákvæmara mati á getu hvers nemanda, sem hlýst af einstaklingsmiðuðum prófum, og auknum sveigjanleika þegar kemur að fyrirlögn.

Verkefni til þriggja ára

Menntamálastofnun hóf undirbúning verkefnisins strax í ársbyrjun 2016 með skipan teymis sem mun í samráði við hagsmunaaðila vinna ötullega að innleiðingunni næstu árin en áætlað er að það taki þrjú ár.

Í fyrsta áfanga, sem nú er að hefjast, hafa hefðbundin próf verið færð yfir í rafrænt umhverfi og þau stytt. Stafsetningarhluti samræmdra könnunarprófa er færður yfir í Lesferil en það eru stöðupróf sem eru þróuð hjá læsisteymi Menntamálastofnunar. Stafsetning mun samt ennþá vera prófuð upp að vissu marki sem hluti af ritunarþætti samræmdra könnunarprófa. Í næstu áföngum á að hanna frekar prófatriði sem nýta kosti rafrænna prófa og tengja þau við matsviðmið aðalnámskrár grunnskóla. Árið 2018 er ráðgert að síðasti áfangi innleiðingarinnar taki gildi þegar samræmd könnunarpróf verða gerð einstaklingsmiðuð. Verður þá horfið alfarið frá hinum hefðbundnu línulegu prófum og tekin upp próf sem laga sig að getu nemandans en slík yfirfærsla er aðeins möguleg á rafrænu formi.

Góður og skilvirkur undirbúningur

Undirbúningsvinna Menntamálastofnunar, með góðu og gjöfulu samstarfi skólasamfélagsins alls, hefur skilað mjög góðum árangri á skömmum tíma. Tækjakönnun sem Menntamálastofnun sendi út síðasta vetur, æfingafyrirlagnir í vor og athugasemdir skóla í kjölfar þeirra, ásamt ábendingum kennara og skólastjóra á kynningarfundum, hafa leitt til margvíslegra úrbóta en markmiðið er að gera fyrirlagnirnar og þær breytingar sem þeim fylgja sem auðveldastar fyrir alla skóla. Liður í þeirra viðleitni er að bjóða skólum upp á tvær fyrirlagnarlotur í hverjum árgangi til þess að hægt sé að nýta tækjabúnað skólanna sem best.

Æfingapróf aðgengileg á vefnum

Jafnframt hefur verið tekið í notkun nýtt vefsvæði samræmdra könnunarprófa á heimasíðu Menntamálastofnunar. Þar gefst kennurum, nemendum og foreldrum kostur á að nálgast allar upplýsingar er snúa að undirbúningi og framkvæmd samræmdra könnunarprófa á rafrænu prófi. Þar má meðal annars finna æfingapróf sem hugsuð eru til þess að nemendur, foreldrar og kennarar geti glöggvað sig á viðmóti prófakerfisins sem og innskráningu. Þá hefur einnig verið sett upp Facebook síða rafrænna samræmdra könnunarprófa sem er mikilvægur upplýsinga- og samræðuvettvangur kennara um rafræn samræmd könnunarpróf.

Skólasamfélagið þarf tíma til að venjast nýjungum og höfum í huga að langtímamarkmið innleiðingarinnar eru einstaklingsmiðuð rafræn próf. Fyrirlagnirnar í haust eru í sinni einföldustu mynd aðeins eitt skref á þeirri vegferð.