Munu áfram leita að Guðmundi í nótt

Leit stendur enn yfir að Guðmundi L. Sverrissyni 54 ára karlmanni sem lögreglan á Vestfjörðum lýsti eftir fyrr í dag. Samkvæmt upplýsingum frá Landsbjörg verður haldið áfram að leita í nótt en fleiri björgunarsveitarmenn eru á leið vestur og munu þeir hefja leit strax í birtingu.

Síðast er vitað um ferðir Guðmundar milli klukkan þrjú og fjögur í nótt á Patreksfirði og hefur leitarsvæðið í dag verið Patreksfjörður og næsta nágrenni. Tugir björgunarsveitarmanna taka þátt í leitinni ásamt þremur leitarhundum og þjálfuðum sporhundi.

Samkvæmt upplýsingum frá Landsbjörg hafa ekki borist vísbendingar um ferðir Guðmundar en lögreglan kallar eftir öllum mögulegum upplýsingum frá þeim sem vita nokkuð um ferðir Guðmundar frá því í nótt. Hægt er að ná í lögregluna á Vestfjörðum í síma 444-0400.