Alls þúsund manns sem útskrifuðust úr háskóla hér á landi síðastliðið vor, með meistara- eða doktorspróf fengu senda bókina „Þjóðarplágan Íslam“ eftir norsku blaðakonuna Hege Storhaug. Það var félagið Tjáningarfrelsið ehf. sem stóð fyrir bókasendingunni en hún barst með pósti í dag. Stundin greinir frá þessu. 

„Bókin á erindi til allra sem vilja ástunda upplýsta umræðu um eitt helsta vandamál, sem steðjar að heiminum nú um stundir“ segir í bréfi sem fylgdi bókasendingunni frá félaginu Tjáningafrelsi. Þá eru viðtakendur bókarinnar einnig hvattir í sama bréfi til að gefa bókina áfram að lestri loknum svo að sem flestum gefist kostur til að kynna sér efni hennar.  

Iris Edda Nowenstein var ein þeirra sem fékk bókina senda í dag. Hún vakti athygli á málinu á Twitter síðu sinni og spruttu í kjölfarið út miklar umræður.

Bókasendingin frekar óhugnaleg
Í samtali við fréttastofu sagði hún aðspurð um hvað henni finndist um þetta framtak félagsins Tjáningafrelsið: „ Mér finnst þetta frekar óhugnanlegt, að það sjái einhver tilgang með því að dreifa svona hræðsluáróðri.”

Spurð hvort hún ætli að aðhafast eitthvað í málinu segist hún reikna með því. 

„Já, ég býst við því að senda þeim línu og útskýra mína afstöðu í málinu og hvers vegna mér finnist þetta í rauninni óásættanlegt, að halda því fram að þeir séu að stuðla að upplýstri umræðu með því að dreifa svona hræðsluáróðri.”