Skáklandsliðin á sigurbraut

Íslensku landsliðin í skák unnu bæði sínar viðureignir í 4. umferð Ólympíuskákmótsins sem fram fer í Bakú, höfuðborg Aserbaídsjan, um þessar mundir.

Kvennasveitin hafði sigur gegn sterkri sveit Moldóvu en andstæðingarnir voru stigahærri á öllum borðum. Lenka Ptacnikova og Hallgerður Helga Þorsteinsdóttir unnu baráttusigra með svörtu og Veronika Steinunn Magnúsdóttir náði jafntefli á 4. borði. Aðra umferðina í röð vannst sigur gegn sterkri sveit en síðast voru það Englendingar sem lágu í valnum.

Karlasveitinn vann Færeyinga nokkuð örugglega með 3 ½ vinningi gegn ½. Hannes Hlífar Stefánsson gerði jafntefli við Helga Dam Ziska á 1. borði en aðrir unnu. Stórmeistarinn Hjörvar Steinn Grétarsson hefur farið mikinn það sem af er móti og unnið allar sínar skákir.

Á morgun mætir karlasveitin Eistum en konurnar etja kappi við Mexíkóa.