Segja tillögur starfshóps landbúnaðarráðherra vera fjandsamlegar neytendum

Félag atvinnurekenda gagnrýnir harðlega skipan og tillögur starfshóps landbúnaðarráðherra varðandi viðbrögð við tollasamningi Íslands og Evrópusambandsins. Ólafur Stephensen, framkvæmdastjóri Félags atvinnurekenda, telur að tillögurnar muni snuða neytendur um þann ávinning sem felst í tollasamningi Íslands og ESB. Þá er einnig gagnrýnt að enginn fulltrúi neytenda og innflytjenda búvöru hafi verið í starfshópnum. Þetta kemur fram í tilkynningu frá Félagi atvinnurekenda og í frétt á vefsíðu félagsins.

Enginn fulltrúi neytenda í starfshópnum

Gunnar Bragi Sveinsson, landbúnaðarráðherra, skipaði síðastliðinn apríl starfshóp til að fjalla um viðbrögð við tollasamningi Íslands og ESB um gagnkvæma niðurfellingu og lækkun tolla á landbúnaðarvörum.

Sjá einnig: Félag atvinnurekenda fagnar tollalækkun 

Hópurinn var skipaður fulltrúum utanríkis- og atvinnuvegaráðuneyta, fulltrúum landbúnaðarins (Bændasamtakanna og búgreinafélaga) og fulltrúa frá Samtökum iðnaðarins. Enginn fulltrúi neytenda eða innflytjenda búvöru var í starfshópnum.

Ólafur Stephensen segir það „ekki koma á óvart, miðað við að hópurinn var eingöngu skipaður fulltrúum ríkisins og innlendra framleiðenda, að tillögurnar gangi að hluta til út á að hafa aftur af neytendum þann ávinning í formi fjölbreyttara úrvals og lægra vöruverðs, sem samningurinn við ESB átti að færa þeim.“

Segir tillögurnar neytendafjandamlegar

Tillögur starfshópsins eru þrjár. Í fyrsta lagi að þeir tollfrjálsu innflutningskvótar sem samið var um við ESB verði nýttir til að bregðast við kjötskorti á innanlandsmarkaði. Í öðru lagi að ESB-tollkvótarnir verði boðnir upp oft á ári, en ekki fyrir heilt ár í senn líkt og nú er gert. Í þriðja lagi að herða skuli heilbrigðiskröfur til innflutnings.

Ólafur telur þessar tillögur vera neytendafjandsamlegar, og segir tilgang tollfrjálsra innflutningskvóta vera „að auka vöruúrval, efla samkeppni við innlendan landbúnað og lækka verð til neytenda, ekki að bregðast við skorti.“

Þá telur hann að tíð uppboð á tollkvótum muni reynast kostnaðarsöm fyrir innflytjendur, og því skila sér í hærra verði til neytenda.

Varðandi hertar heilbrigðiskröfur segir Ólafur það vera óþarfa, þar sem um sé að ræða innflutning frá ríkjum ESB. „Þær vörur hafa staðist heilbrigðiseftirlit samkvæmt öllum sömu kröfum og gilda samkvæmt íslenskum lögum, enda er sama matvælalöggjöf í gildi þar og hér.“

Segir þetta kaldhæðnislegt og fjarstæðukennt

Ólafur telur ólíklegt að tillögurnar séu í takt við samninginn við ESB, en í honum stendur að ávinningi samningsaðila megi ekki stefna í hættu „með öðrum takmarkandi innflutningsráðstöfunum." Þá segir Ólafur vera kaldhæðnislegt að Gunnar Bragi standi fyrir þessum tillögum, þar sem hann hafi verið í forsvari sem utanríkisráðherra að gera samninginn við ESB.

„Það er svo kaldhæðnislegt að nú stendur málið þannig að Gunnar Bragi Sveinsson, utanríkisráðherrann sem gerði samninginn við ESB og stærði sig þá af því að hafa náð fram meira vöruúrvali og lægra verði fyrir neytendur, er kominn í stól landbúnaðarráðherra og á samkvæmt drögum að áliti atvinnuveganefndar að beita sér fyrir aðgerðum sem hafa aftur af neytendum þann réttmæta ávinning. Þetta er fjarstæðukennt.“