Ekki fleiri kynferðisbrot tilkynnt til lögreglu síðan í ágúst 2013

Alls voru 27 kynferðisbrot tilkynnt til lögreglunnar á höfuðborgarsvæðinu í júlí síðastliðnum en ekki hafa fleiri slík brot komið inn á borð lögreglu í einum mánuði síðan í ágúst 2013.

Þetta má sjá í mánaðarskýrslu LRH fyrir júlímánuð en þar kemur fram að fjöldi tilkynninga í júlí sé meiri en að meðaltali síðustu þrjá mánuði á undan og síðustu 12 mánuði.

Þá bárust lögreglunni 90 tilkynningar um ofbeldisbrot í júlí og eru það aðeins færri brot en í júní þegar 96 brot voru tilkynnt.

306 tilkynningar bárust um þjófnaði og eru það ívið fleiri tilkynningar en í júní þegar tilkynningarnar voru 291. Þá voru 64 innbrot tilkynnt til lögreglu í júlí en 55 tilkynningar bárust í júní.