Metútborgun hjá Íslenskri getspá í dag

Þrír heppnir vinningshafar og fjölskyldur þeirra fá í dag digrar summur inn á reikninga sína.

Fyrst bera að nefna vinningshafann í Víkingalottóinu þann 27. júlí sem var með allar aðaltölur réttar og hlaut ríflega 260 milljónir í vinning. Sá heppni keypti miðann sinn í N1 við Stórhjalla í Kópavogi.

Í sama útdrætti í Víkingalottóinu var einn vinningsmiði með bónusvinning upp á rúmlega 10,6 milljónir. Sá var með miðann sinn í áskrift.

Þá var vinningshafi í Lottó þann 23. júlí með tæplega 35,8 milljónir króna. Sá miði var keyptur í Skýlinu við Friðarhöfn í Vestmannaeyjum. Eigendurnir hafa vitað af vinningnum í dágóðan tíma en voru ekki að flýta sér sérstaklega við að skila honum til Íslenskrar getspár. Miðinn ferðaðist um landið í sumar í rassvasa eigandans. Vinningshafarnir eru eldri borgarar með nokkur uppkomin börn, en þau ætla að deila vinningnum með börnum sínum og barnabörnum, og nota upphæðina til að greiða niður íbúðalán.