Dapurt yfir mönnum í vatnslitlum laxveiðiám

Miklir þurrkar undanfarnar vikur valda laxveiðimönnum miklum erfiðleikum. Rennsli í ám vestanlands og norðan hefur minnkað gríðarlega síðan veiðin hófst í júní.

„Það hefur bara ekki komið dropi úr lofti sem hægt er að tala um í einar sjö vikur. Eðlilega hefur þetta áhrif, það segir sig sjálft. Það sem hefur verið að veiðast er yfirleitt á þunna tauma og smáflugur,“ segir Einar Sigfússon, veiðileyfasali í Norðurá í Borgarfirði og Haffjarðará á Mýrum.

Um það leyti sem veiði hófst í Norðurá, sem var 4. júní að þessu sinni, mældist vatnsrennsli í ánni um 40 rúmmetrar á sekúndu samkvæmt vef Veðurstofunnar. Nýjustu mælingar sýna hins vegar að rennslið er komið undir 4 rúmmetra, sem sagt orðið tíu sinnum minna.

Einar neitar því ekki að veiðimenn hafi verið dálítið daprir vegna þessa. Menn láti hins vegar ekki hugfallast.

„Það þýðir ekkert annað en að bera höfuðið hátt því ljósi punkturinn er að fiskurinn er til staðar,“ segir Einar. „En þetta er búið að hafa þau árif síðustu fjórar vikurnar að það hefur dregið stöðugt úr tökum, alls staðar á öllu Vestur- og Norðurlandi. Í að minnsta kosti sjö vikur hefur verið sól og blíða og minnkandi vatn og súrefnissnautt. Það gerir að verkum að takan minnkar.“

Þessi staða er ekki ný en Einar segir öllu muna að þrátt fyrir allt sé talsverður fiskur í flestum ám. „Þannig að það er miklu betra ástand heldur en 2014 til dæmis,“ segir hann. Að vísu hafi sterkar smálaxagöngur sem menn hafi átt von í kring um 20. júlí ekki skilað sér. „Gamlir Norðurármenn eru alveg á því að þessi fiskur sé enn þá bara niðri í Hvítá og Straumunum og eigi eftir að koma inn þegar meira vex í.“

Í fyrrasumar veiddust 2.886 laxar í Norðurá. Það sem af er tímabilinu nú hafa veiðst tæplega eitt þúsund fiskar. Enn er nóg að hafa því þúsundir fiska hafi farið um teljarann við fossinn Glanna að sögn Einars.

„Þess vegna er svo svekkjandi að það skuli ekki vera vatn til að ná honum upp. En einn góðan veðurdag kemur gusa og þá eru þeir sem verða til staðar þeir heppnu,“ fullyrðir Einar og bendir á að ólíklegt sé að haustrigningar bregðist. Þá muni hluti af þeim fiski sem sé inni á dal færa sig niður ána aftur. „Þá dreifist þetta aftur um alla ána.“

Haffjarðará er einnig á snærum Einars sem kveður svipað gilda um hana. Rennsli þar var um 12 rúmmetrar á sekúndu fyrstu dagana í júní. Nýjustu tölur þaðan sýna tæplega 5 rúmmetra rennsli. Áin býr að vatnsmiðlun úr Hlíðarvatni og Svínavatni í gegn um Oddastaðavatn.

„Það er mikill fiskur í henni og stundum koma þokkalegir dagar en það vantar þetta ferska og súrefnisríka vatn,“ segir Einar sem mældi vatnshitastigið í bæði Norðurá og Haffjarðará fyrir um viku.

„Þá var Norðuráin 20 gráður og Haffjarðaráin 22 gráður. Þetta er bara orðin svona hægeldun á fiskinum,“ segir hann. Hitastig á bilinu 8 til 11 gráður telji hann vera ákjósanlegt. „Það er til kenning hjá Bretum um að þegar hitastig vatnsins sé orðið hærra en lofthitinn þá geti menn gleymt þessu.“

Þessi frétt birtist upphaflega í Fréttablaðinu.