Zlatan: Líklega stærsti klúbbur sem ég hef spilað fyrir

Zlatan Ibrahimovic, framherji Manchester United, var yfir sig ánægður eftir fyrsta alvöru leik hans með United. Hann tryggði United sigur í leiknum um Samfélagsskjöldinn gegn Leicester, en Svíinn skoraði sigurmarkið sjö mínútum fyrir leikslok.

„Þetta er notaleg tilfinning. Fyrsti opinberi leikurinn, við spiluðum um bikar og við unnum. Þetta er minn 31. titill og ég er ofuránægður. Vonandi get ég unnið mikið meira en þetta,” sagði hetjan í leikslok.

„Þetta var erfiður leikur. Við spiluðum gegn góðu liði. Þeir voru mjög góðir. Eitthvað stórt er að gerast með okkar lið. Við byrjum á bikar.”

„Mér líður mjög vel. Liðið er frábært. Góðir meðspilarar, góður andi. Stjórinn gerir allt til þess að vinna. Þetta er líklega stærsti klúbbur sem ég hef spilað fyrir,” sagði Zlatan og bætti við að lokum:

„Eini klúbburinn sem ég get borið saman við þennan er Milan.”