Félög Middeldorps ekki með starfsleyfi í Hollandi

Félög sem sögð eru eiga að fjármagna byggingu einkarekins spítala og hótels í Mosfellsbæ eru ekki á skrá yfir aðila sem hafa starfsleyfi hjá hollenska fjármálaeftirlitinu AFM eða hollenska seðlabankanum DNB.

Henri Middeldorp, stjórnarformaður MCPB, sem hyggst standa að framkvæmdunum í Mosfellsbæ hefur sagt að þær verði fjármagnaðar með láni frá félaginu Burbanks Capital, sem sé dótturfélag Burbanks Holding, sem hann eigi meirihlutann í. Það fjármagn, um 50 milljarðar króna, sé komið frá fjárfestum sem ekki séu hluthafar í Burbanks Capital heldur sé félagið með fé í eignastýringu fyrir þá.

Middeldorp segir að hjá Burbanks Holding starfi einn starfsmaður auk hans sjálfs og félagið hafi fjárfest í verkefnum víða um heiminn fyrir hönd sinna fjárfesta, til dæmis í Evrópu, Mið-Austurlöndum og Bandaríkjunum. Allar fjárfestingarnar hafi verið í vatnsverkefnum, sjálfbærum auðlindum eða heilbrigðisgeiranum.

Michiel Gosens, upplýsingafulltrúi hjá hollenska fjármálaeftirlitinu AFM segir að allir sem veiti fjármálaþjónustu í Hollandi þurfi starfsleyfi frá hollenska seðlabankanum DNB eða AFM. „Eignastýring myndi falla undir okkar umsjón. Við erum með sérstaka eignastýringardeild,“ segir Gosens sem kveðst þó ekki geta tjáð sig um einstök mál eða fyrirtæki.

Ekkert félag undir nafninu Burbanks er á skrá yfir aðila með starfsleyfi hjá AFM eða DNB. Félögin er að finna í hollensku fyrirtækjaskránni en þau hafa ekki skilað ársreikningi.

Middledorp segir félögin ekki þurfa starfsleyfi. „Þú þarft leyfi frá Seðlabankanum þegar þú sækist eftir fé opinberlega en við erum ekki að því.“

Á Facebook-síðu samvinnufélagsins Burbanks Capital var auglýst eftir fjárfestum til að leggja fram fé gegn allt að átta prósenta ávöxtun. Á heimasíðu Burbanks Capital var fjárfestum sem lögðu verkefninu til fé svo lofað sex prósenta arðgreiðslum á ári. „Það er annað mál, það sem er á Facebook og netinu er fyrir einstaklinga sem vilja vera meðlimir í samvinnufélaginu,“ segir Middeldorp.

Hann hefur sagt að félagið þurfi ekki á fjármagninu að halda, þar sem verkefnið sé fullfjármagnað en hann líti á það sem samfélagslega skyldu sína að leyfa fólki að taka þátt í verkefninu gegn hærri ávöxtun en fáist almennt í Evrópu.

Þessi frétt birtist upphaflega í Fréttablaðinu.